Сүүлийн үед улс төрчид болон улс төрийн намууд ирэх оны сонгуульдаа бэлдэж төрөл бүрийн амлалт өгөх болсон.  МАХН л гэхэд үнэгүй байр олгож, цалингийн дундаж хэмжээг таван сая төгрөгт хүргэхээ амлаад буй. Харин эрх баригч МАН ирэх оны төсвийг сонгуульд зориулан баталсан гэх шүүмжлэлүүд нийгэмд хөвөрч байна. 

Харин сонгуулийн энэ "шоудалтад" парламентад суудалгүй намууд шүүмжлэлтэй хандаж, заримыг нь үгүйсгэх оролдлогууд хийж байна. Тухайлбал, Хөдөлмөрийн үндэсний нам:

-Улс төрчид сонгуульд ялахын тулд хууран мэхэлсэн амлалт өгч болохгүй. Өмнөх сонгуулиар ард иргэд  сая саяар нь мөнгө амласны улмаас ханш унаж, ажилгүйдэл бий болсон. Энэ явдлаас Монголын ард иргэд баяжаагүй харин улс төрчид хожсон. Эрх мэдлийн төлөө хоосон амладаг цаг үе өнгөрсөн. Шулуухан хэлэхэд МАХН-ын үнэгүй байр бол бүтэхгүй зүйл. Яагаад гэвэл өмнө нь 8 хувийн зээлийг эхлүүлэхийн тулд 2 тэрбум ам.долларын зээл тавьсан одоо хүртэл бид нар тэрийг төлж байна. Тийм болохоор цалин, тэтгэврийг нэмж чадахгүй байдал үүсээд байгаа.

Хүн болгонд үнэгүй байр өгнө нь гэвэл 12 тэрбум ам.доллар хэрэгтэй. Уг асуудлыг өр зээлээр шийднэ гэвэл Монгол Улс уг өрийг 205 жил төлнө. Н.Энхбаяр ийм утгагүй юм ярьж, Монгол Улсыг хорлож яах гээд байгаа юм хэмээн мэдэгдлээ. 

Харин тус нам өөрсдөө "багш нарын цалинг хоёр сая төгрөг болгох" амлалтыг өгч байгаа ажээ. 

---