Дэвид Ийстмэн нь 1995 онд цагдаагийн ахмадын амь насыг хөнөөсөн хэрэгт буруутгагдаж бүх насаараа хоригдох ял авчээ. Гэвч тэрээр 19 жил хоригдсоныхоо дараа хэрэг нь цагаадаж, шударгаар шүүгдээгүй гэж үзсэн байна.

Шүүгчид, эрх баригчдын алдаатай шүүлтээс болж амьдралынхаа 20 орчим жилийг хорих газарт өнгөрөөсөн тул нөхөн төлбөр олгохыг шаарджээ. Автралийн шүүх 74 настай Ийстмэнд 7 сая авс.доллар буюу ойролцоогоор 5 сая ам.долларын нөхөн төлбөр олгохоор болсон байна.

Гэвч тухайн үед хууль хяналтын байгууллага, улс төрчдийг донсолгосон Колин Винчестерийн аллага шийдэгдэлгүй хэвээр үлджээ.

 

 

Ийстмэнийг хоригдож байх хугацаанд ээж, төрсөн хоёр дүү нь нас барсан байна. Мөн тэрээр гэр бүлтэй болох, ажил мэргэжилдээ амжилт гаргах цаг хугацаагаа буруу шүүгдэж, ял эдэлснээс болж алдсан хэмээн заргалджээ.

Винчестер нь бусдын гарт амиа алдсан Австралийн цагдаагийн хамгийн өндөр албан тушаалтан юм. Канберра дахь гэрийнхээ гадаа толгойдоо хоёр удаа буудуулж амиа алдсан нь одоо ч анхаарал татсан, нууцлаг хэрэгт тооцогддог байна. Ийстмэн хэд хэдэн удаа цагдааг заналхийлж байсан учир тухайн үед хамгийн гол сэжигтэн болжээ.

 

 

Хоригдож байсан 19 жилийн хугацаандаа тэрээр гэм буруугүй гэдгээ нотлохын тулд 1999, 2000, 2001, 2005, 2008 онуудад удаа дараалан давж заалдах шатны шүүхэд хандаж байсан ч бүтэлгүйтсээр байжээ. Харин 2014 онд давж заалдсан нь амжилттай болж, шүүгчид түүний хилсээр гүтгэгдсэн гэж үзэн сулласан байна.

 

Эх сурвалж: www.bbc.com

---