Манитоба их сургуулийн профессор Тайс Боермагийн эхлүүлсэн судалгаагаар 2000 оноос хойш "хийсвэр" хагалгаагаар төрөх явдал дэлхий даяар хоёр дахин нэмэгджээ. Тодруулбал 2000 онд дэлхий дээр 16 сая нярай "хийсвэр" хагалгаагаар мэндэлсэн бол 2015 онд 29,7 сая буюу бараг 30 сая нярай хагалгаагаар мэндэлсэн байна. Судалгаа хийсэн мэргэжилтнүүдийн ярьж байгаагаар ирэх жилүүдэд ч энэ төрлийн төрөлтийн тоо нэмэгдэх хандлагатай гэнэ.

Өөрөөр хэлбэл дэлхий дээр мэндэлж байгаа таван хүүхэд тутмын нэг нь хорвоод мэндлэхдээ жам ёсны бус буюу "хийсвэр" хагалгаагаар эцэг эхийнхээ гар дээр ирж байна. Судалгаа хийсэн дэлхийн 169 орноос эхчүүд хамгийн их "хийсвэр" хагалгаагаар төрдөг улс орнуудын тоонд Бразили, Египет, Турк, Венесуэл улсууд багтаж байна. Эдгээр улсуудад "хийсвэр" төрөлт  2015 оны байдлаар 52-55 хувьтай байжээ.

Дэлхий дээр кесар хагалгааны эзэлж байгаа хувийг харуулбал:

-Баруун ба Төв Африкт 4.1%

-Зүүн ба Өмнөд Африкт 6.2%

-Ойрхи Дорнод, Хойд Африкт 29.6%

-Өмнөд Азид 18.1%

-Зүүн Ази, Номхон далайд 28.8%

-Латин Америк, Карибын орнуудад 44.3%

-Зүүн Европ төв Азид 27.3%

1990 оны байдлаар Монгол улсын хэмжээнд нийт төрөлтийн нэг хувийг "хийсвэр" хагалгаа эзэлж байсан бол 2016 оны байдлаар 25,4 хувийг эзэлж байна.

Ихэвчлэн өөрөөрөө төрөхөд хүндрэлтэй, эсвэл огт боломжгүй гэсэн эмчийн оношилгоогоор эхчүүд "хийсвэр" хагалгаа хийлгэдэг. Зарим тохиолдолд төрөх явцыг хялбарчлах хүсэлтэй эмэгтэйчүүд хагалгаа хийлгэх нь элбэг болжээ. Тэгвэл Дэлхийн эрүүл мэндийн байгууллага шаардлагагүй тохиолдолд хагалгаа хийхгүй  байхыг уриалж байна.

 

Эх сурвалж: www.cnn.com  

---