Хятадын тэрбумтнууд, чинээлэг эрхмүүдийн дунд технологийн салбараас төрөн гарсан бизнес эрхлэгчдийн эзлэх хувь нэмэгдсэн гэдгийг Hurun судалгааны хүрээлэнгээс мэдээлэв. Түүнчлэн эм зүй, гахайн фермерийн салбарын шилдгүүд супер баян эрхмүүдийн эгнээнд дээгүүр бичигдэх болсон байна.

Судалгааны хүрээлэнгийн мэдээлснээр Хятадад шинээр төрөн гарсан саятан, тэрбумтнуудын тоо цөөхөн байгаа ч тэдний эзэмшиж буй хөрөнгийн хэмжээ нэмэгджээ. Үйлдвэрлэл, барилгын салбарын чинээлэг эрхмүүд жагсаалтын сүүл мушгисан байна.

Алибаба цахим худалдааны сүлжээг үүсгэн байгуулагч Жэк Ма 39 тэрбум ам.долларын хөрөнгөтэйгээр Хятадын тэрбумтнуудын жагсаалтыг тэргүүлсэн байр сууриа хадгалжээ. Харин хоёрдугаарт Teнсент цахим сүлжээг үүсгэн байгуулагч Пони Ма 37 тэрбум ам.долларын хөрөнгөтэйгээр бичигдсэн байна.

 

 

Хансон эмийн компаний эзэд Сан Пиао Юань, Жон Хуй Юань нар 15 байр урагшилж хөрөнгийн хэмжээ нь хоёр дахин нэмэгдэж 25 тэрбум ам.доллар болсноор жагсаалтын тавдугаарт оржээ.

10 орчим жилийн өмнө Хятадын хөрөнгөтнүүдийн жагсаалтад эмийн үйлдвэрийн эзэд дөрвөн хувийг эзэлдэг байсан бол одоо найман хувь болж нэмэгджээ.

Эдгээр өөрчлөлт нь Хятадын эдийн засгийн бодлоготой уялдаж байгааг эх сурвалж онцолж байна. Цөөнгүй жилийн өмнөөс Хятад дэлхийн үйлдвэрлэлийн гол төв болохыг хичээж байсан бол ойрын жилүүдэд өндөр технологийн ур чадвар бүхий инновацийн төв болохыг зорьж эхэлжээ.

Энэ жилийн жагсаалтад багтсан Колин Хуан Зен нь Пиндуодуо цахим худалдааны компанийг үүсгэн байгуулагч юм. Тэрээр 1980-аад оноос хойш жагсаалтын шилдэг 10-т багтсан өөрийн хүчээр хөрөнгөө босгосон анхны бизнес эрхлэгч гэдгээрээ онцлог ажээ. 39 настай эрхэм 19 тэрбум ам.долларын хөрөнгөөр долдугаарт бичигдсэн байна.

 

 

ТикТок, Тоутиао зэрэг олонд танигдсан видео, мэдээллийн аппликейшнуудыг эзэмшдэг Байтдэнс компанийн үүсгэн байгуулагч 36 настай Жан Иемин 13,5 тэрбум ам.долларын хөрөнгө хуримтлуулж шилдэг 20-д багтсан технологийн салбарын мэргэжилтнүүдийн нэг юм.

 

 

Африкийн гахайн ханиад Азийн орнуудад тархсантай холбогдуулан гахайн махны үнэ өссөн нь Хятадын хоол хүнсний салбарын бизнес эрхлэгчдэд таатай боломж олгов. Хятадын хоёр дахь том гахайн мах үйлдвэрлэгч Муюаний эзэд болох Чин Инлин, Чин Ин нарын хөрөнгө гурав дахин өсч 14 тэрбум ам.долларт хүрсэн бол Хайдилао халуун тогооны сүлжээ зоогийн газрын эзэд гэр бүлийн Жан Ёон, Шу Пин нарын хөрөнгө хоёр дахин өсч 17 тэрбум ам.долларт хүрсэн байна.

 

 

Эх сурвалж: www.cnn.com

---