Бангладешийн төгсөх курсын оюутан дотуур байрандаа алагдсан тухай мэдээ өнгөрсөн ням гарагт гарсан. Засгийн газрын саяхны өгсөн мэдээллээр оюутан амиа алдахаасаа өмнө нилээд хэдэн цагийн турш зодуулсныг гэрчүүд харсан байна.

Дотуур байранд амьдардаг бусад оюутнуудын хэлснээр Абрар Фахадыг оройн 20 цагийн үед өрөөнөөс нь авч гарсан ба багадаа дөрвөн цагийн турш түүнийг зодсон гэжээ. Задлан шинжилгээний үеэр түүний бие маш хүнд бэртэл гэмтэл авсан байсныг тогтоосон юм.

Дакагийн Бангладеш Их сургуулийн инженерийн ангийн оюутны үхлийн хэрэгт холбогдуулан эрх баригч Авами лиг намын залуучуудын Бангладеш Чхатра холбооны гишүүдийг барьж саатуулжээ. Уг холбооны гишүүд оюутнуудын эсрэг хүч хэрэглэж, тэднийг дээрэлхэж, зодож тарчлаадаг талаар гомдол их байдаг.

Цагдаа нар нийт 13 хүнийг баривчлан саатуулж, зургаан сэжигтнийг эрэн сурвалжилж байна. Комиссар Мунстасирул Ислам оюутныг эцсийн амьсгалаа авах хүртэл гэмт этгээдүүд зодсоноос болж амиа алдсан гэдгийг батлан мэдэгдээд байгаа юм.

21 настай оюутан залуугийн үхлийн дараа тус улсын нийслэл Дака болоод бусад хотуудад оюутнууд жагсаал цуглаан зохион байгуулж, түүнийг үхэх хүртэл нь зодсон гэмт этгээдүүдэд ялын дээд хэмжээ цаазаар авах ял оноохыг шаардаж жагссан билээ.

 

 

Эх сурвалж: www.bbc.com  

---