"Үргээлэг-1, 2", "Бодлын хулгайч" киногоор олонд танигдсан жүжигчин Ж.Баясгалан сүүлийн 864 хоногийн турш өөртэйгээ хэрхэн тэмцэж буйгаа өчигдөр эрүүл мэндийн даатгалын нэгдсэн систем болох Инсурын нээлтийн үеэр олон нийтэд дэлгэсэн юм.

Тэрбээр жүжиглэхээс гадна экстрим спортоор хичээллэх дуртай нэгэн байсан бөгөөд дөрвөн дугуйт мотоциклоор хичээллэж, чамгүй амжилт гарган ээлжит уралдаандаа уралдаж яваад, 2017 оны тавдугаар сарын 13-нд осолдож, ганцхан хормын дотор түүний амьдрал хэрхэн өөрчлөгдсөнийг Инсурын тайзнаа нулимстай дурсан ярив.

Монголын дөрвөн дугуйт Мотоциклчдын холбооноос зохиогдсон тэмцээнд оролцох үеэрээ маш хүнд гэмтэж, 48 цагийн турш үхэлтэй тэмцэж байх үед итгэлийг галыг бадраасан сайхан үг хэлсэн нь түүний насны хань “Хайраа чи надтай анх гэрлэхдээ "би гайхамшиг бүтээнэ" гэж надад амласан ш дээ. Чи одоо тэрийгээ бүтээгээч. Одоо хоёулаа бүхнийг давж гаръя” гэж хэлсэн байна.

Ингээд тэд гайхамшгийг бүтээхээр БНСУ-ыг зорьсон ч тэр итгэл найдвар хормын төдийд унтрах шиг болжээ.

“Алхахгүй, босохгүй, тэргэнцэр дээр суух магадлал ч маш бага. Ийм өвчтэй хүн урт насалдаггүй” гэж солонгос эмчийг хэлэхэд нь би “Намайг Баясгалан гэдэг. Би Монгол хүн. Би хөл дээрээ босоод хүүхдүүдээ дагуулаад ирнэ. Тэр үед та энэ өвчнийг эмчилсэн анхны эмч нь болоорой” гэж хэлсэн байна.

Ингээд түүний амьдрах тэмцэл эхэлж, Монголдоо ирээд Грандмед эмнэлэгт 864 хоногийн туршид өглөөнөөс орой болтол сэргээн засах эмчилгээ хийлгэн, зөвхөн босохын төлөө тэмцжээ. Тэрбээр өөрийнх нь төлөө хичээнгүйлэн ажиллах эмч, сувилагч, асрагч, жолооч нарыгаа “Мөрөөдлийн баг” гэж нэрлэсэн байна. Хүнд хэцүү үед найз нөхөд нь холдоогүйгээр барахгүй харин гар, хөл, тэмцэл нь болсон гэдгийг дурдсан юм.

Жүжигчин Ж.Баясгалангийн босох, урагш тэмүүлэх хүч нь түүний хайртай эхнэр, дөрвөн хүүхэд, эцэг, эх нь байсан төдийгүй амьдрах сайхан гэдгийг мэдэрч, өөрийнхөө төлөө хайртай дотно хүмүүсийнхээ төлөө эрүүл мэндээ даатгуулж, дархлаатай амьдарцгаая хэмээн уриаллаа.

Экстрим спортын төрлөөр хичээллэж байгаа хүн бэртэж гэмтсэн тохиолдолд тухайн хүн өөрийнхөө амь амьдралаар хохироод үлдэх ёстой юу. Хуулинд албан ёсны тэмцээний явцад иргэний эрүүл мэнд учруулсан гэм хорыг холбогдох хууль тогтоомжийн дагуу гэм буруутай этгээд арилгана гэсэн байдаг. Монголын дөрвөн дугуйт Мотоциклчдын холбоо ямар нэгэн хариуцлага хүлээхгүй хэн нэгний амьдралыг хохироогоод үлдэх гэж үү?  

 

 

---