Өнгөрсөн амралтын өдрүүдэд хотын төвийн хөл хөдөлгөөн ихтэй гудамжинд хандивын хайрцаг барьсан арван жилийн хүүхдүүд “Эрдэнэдалай охинд туслаач” хэмээн зөрж байгаа хүмүүсээс хандив гуйна. Хажуугаар нь 10 гаруй хүн зөрөхөд дор хаяж нэг иргэн 500-5000 төгрөг өгнө. Ихэнхдээ 500-1000 төгрөг өгч харагдав. 

Та бүхэн санаж байгаа бол 2018 оны 11 дүгээр сард цахим сүлжээгээр “Эрдэнэдалай охинд туслаач” хандивын аян өрнөж байсан. Энэ аян үргэлжилж байна уу, эсвэл луйварчдын золиос болоод байна уу гэдгийг тодруулахаар бид Эрдэнэдалай охины ээж Ч.Октябрьтай холбогдсон юм. 

-Таны хувьд 11 сарын өмнө ард түмнээс охинд минь туслаач хэмээн гуйж байсан юм байна. Хандив, тусламж ирсэн үү, охиндоо эмчилгээ хийлгэсэн үү?

-Тухайн үед сайхан сэтгэлтэй хүмүүсийн хандив тусламжаар найман сая төгрөг цугларсан. Одоо бол хэдэн хүүхдүүд сайн дурын үндсэн дээр хичээлийнхээ цаг заваар хандивын хайрцаг бариад тусламж гуйж байгаагаас өөр тусламж байхгүй. Хандивын мөнгөнөөс түнхний хагалгаа, нүдний болроо лазердуулсан. Байнгын эмчилгээ, эм тариа хэрэглэж байгаа. Өнгөрсөн долоо хоногт гуурсаа солиулсан. Одоогоор дансанд 3-4 сая төгрөг байна.

-Тухайн үед бөөрний архаг дутагдалтай тул бөөр шилжүүлэн суулгах хагалгаа хийлгэхийн тулд 40 сая төгрөг хэрэгтэй гэж байсан?

-Харин тийм ээ. Тэр болгон санаагаар хандив тусламж цугладаггүй юм байна. БНСУ, Энэтхэг улсын эмнэлэг рүү бичиг баримтаа явуулсан. Хамгийн гол нь 40 сая төгрөг бүрдээгүй болохоор ойр зуурын эмчилгээ хийгээд байж байна.

Тэдний хувьд ядаж эм, тарианы мөнгөнд тусалъя хэмээн сайн дурын үндсэн дээр амралтын өдрүүдэд өөрсдийн бололцоотой үедээ хандивын хайрцаг бариад зогсдог

-Тэгэхээр хэдэн хүүхдүүд хандивын хайрцагт цугларсан мөнгөө та хэдэд шилжүүлдэг гэсэн үг үү?

-Тэдний хувьд ядаж эм, тарианы мөнгөнд тусалъя хэмээн сайн дурын үндсэн дээр амралтын өдрүүдэд өөрсдийн бололцоотой үедээ хандивын хайрцаг бариад зогсдог. Энэ хэдэн хүүхдүүдэд маш их баярлалаа гэж хэлмээр байна. Үнэндээ хаагуур яаж, хэнд хандахаа мэдэхгүй хэцүү байна.

М.Эрдэнэдалай охин чихрийн шижин өвчнөөр дөрөвхөн настайдаа өвдөж, улмаар 13 жилийн хугацаанд өвчин нь хүндэрч, бөөрний архаг дутагдалд ороод байгаа юм. Түүнд яаралтай бөөр шилжүүлэн суулгах хэрэгтэй тул түүний ээж өнгөрсөн жил ард түмнээс тусламж хүссэн боловч, 40 сая төгрөг бүрдээгүй тул одоогоор эмчийн хяналтан доор эмчилгээ хийлгэн байгаа юм. 

Та бүхэн гудамжинд "Эрдэнэдалай охинд туслаач” хандивын хайрцаг явж байвал чадлын хэрээр туслахыг манай хамт олон уриалж байна. 

---