Бүгд найрамдах Казахстан Улсад өчигдөр Алматы-Усть-Каменогорск чиглэлийн автобус хурдны зам дээр осолдсон талаар тус улсын Үйлдвэр, дэд бүтцийн яамны хэвлэлийн албанаас мэдээлснээс эш татаж tengrinews.kz сайт мэдээллээ.

Урьдчилсан мэдээгээр, 812 LKB 05 улсын дугаартай автобусны жолооч унтсаны улмаас өмнөө явж байсан тээврийн хэрэгслийг хурдны замын 812 дахь км-т Аягөз дүүргийн Айгыржал тосгонд мөргөжээ. Тухайн автобусанд 23 хүн зорчиж явсны 14 нь Монгол Улсын иргэн байсан бөгөөд дөрвөн хүн гэмтэж бэртсэн байна.

Энэ талаар бид ГХЯ-тай холбогдон тодруулахад “Өчигдөр оройн 19.00 цагийн байдлаар Монгол Улсын 14 иргэн осолдсон гэх мэдээлэл Казакстан Улсад суугаа элчин сайдын яаманд ирээгүй байна. Энэ талаарх яаралтай мэдээллийг авахаар бид бүхэн Казакстанд суугаа элчин сайдын яамтайгаа холбогдож байгаа” гэх тайлбарыг өглөө.

 

---