Гайти улсад шинэ Ерөнхий сайдыг томилох үеэр Сенатын гишүүн Парламентын ордны гадаа гал нээж фото сурвалжлагч болон хамгаалалтын ажилтныг шархдуулжээ. Ассошейтэд Пресс олон улсын мэдээллийн агентлагийн гэрэл зурагчин Чери Диу Налио Сенатын гишүүний суманд өртөж нүүрэндээ шархадсан байна. Суманд өртсөн хоёр дахь хүн хамгаалалтын албаны ажилтан Леон Лебланк болохыг мэдээлжээ.

Нийслэл Порт-о-Прэнс хотод болсон явдлын дараа эмч нар гэмтэж шархадсан иргэдийн авсан сумны шархыг эмчилж, амь насанд халгүй гэжээ. Сенатч Жан Мари Ральф Фетьер Парламентын ордноос гарахад замд нь хөндөлдсөн жагсагч, босогчдыг холдуулахын тулд гал нээсэн тухай эх сурвалж мэдээлэв. Өөр нэг Сенатын гишүүний ярьснаар Фетьер гал нээж анхааруулах гэсэн боловч бууны сум гэмгүй иргэдийг оносон байна.

 

 

Харин гал нээсэн сенатч радиод өгсөн ярилцлагадаа бүлэг этгээдүүд над руу дайрсан, тэд намайг машинаас минь чирж буулгахыг оролдсон учраас биеэ хамгаалсан, биеэ хамгаалах бол хүний эрх хэмээн ярьжээ.

Гайти улсын шинэ Ерөнхий сайдаар Фриц Уильям Мишелийг томилох хэлэлцээр хоёр хоногийн турш үргэлжилж байна. Улс төрийн шалтгаанаас болж эмх замбараагүй байдал газар авсан энэ үед Ерөнхийлөгч Жовенель Моисе НҮБ-ын Ерөнхий Ассамблейн чуулга уулзалтад оролцохоор АНУ-ыг зорих ёстой боловч ням гарагаас хойш нислэгээ хойшлуулсаар байгаа юм.

Засгийн эрх баригчдыг эсэргүүцэж буй жагсагчид шатахууны хомсдол, амьдрах өртөг нэмэгдсээр байгаад уур бахимдлаа илэрхийлж зам харилцааг мод, хад чулуу, машин техникээр хааж боожээ. Иргэдийн эсэргүүцлээс өмнө Парламентын гишүүд танхимдаа сандал шидэлцэж өөр хоорондоо нударга зөрүүлээд амжсан юм.

 

 

Эх сурвалж: www.theguardian.com

---