АНУ-ын Ерөнхийлөгч Дональд Трамп НҮБ дахь суурин төлөөлөгчөө хугацаанаас нь өмнө чөлөөллөө. 2016 оноос хойш жил долоон сарын хугацаанд АНУ-ыг төлөөлөн НҮБ-д элчээр сууж байсан Никки Хэли өөрийн хүсэлтээр ажлаа хүлээлгэж өгөх болсон гэж Цагаан ордонд болсон уулзалтын үеэр Трамп мэдэгджээ. Никки Хэлийн огцрох тухай гэнэтийн мэдээ улс төрчдийг цочирдуулсны дараахан Трамп түүнийг Цагаан ордонд хүлээн авч үдэн гаргаж өгсөн.

 

Энэ үеэр “НҮБ дахь суурин төлөөлөгч өмнө нь хэд хэдэн удаа амралт авах хүсэлтээ илэрхийлж байсан. Хоёр жил гэдэг хангалттай хугацаа. Тэр маш гайхалтай үүрэг даалгавраа гүйцэтгэсэн” гэж Трамп ярьжээ. Никки Хэли чухам ямар шалтгаанаар ажлаа хүлээлгэж өгөх болсноо тайлбарлаагүй. Харин “Би маш чухал цаг үеийг НҮБ-д өнгөрөөсөн. Аливаа зүйлд хэмжээ хязгаар байдаг гэдэгт би итгэдэг” гэсэн байна. 

 

 

Дональд Трамп гурван долоо хоногийн хугацаанд дараагийн суурин төлөөлөгчөө сонгох ёстой. Тэрээр өөрийн охин Иванка Трамп болон Аюулгүйн Зөвлөлийн дэд зөвлөх байсан Дайна Пауел нарыг нэр дэвшүүлэхээр яригджээ. Иванка Трампыг сонговол ураг төрлөө албан тушаалд томилсон гэж буруутгагдах байсан ч Ерөнхийлөгчийн охин төд удалгүй өрсөлдөөнөөс нэрээ татаж байгаагаа мэдэгдсэн юм. 

 

Никки Хэли 2010 онд Өмнөд Кэролин мужийн захирагчаар сонгогдож анхны эмэгтэй, хамгийн залуу захирагч болж байсан. Хоёр ч удаа улиран сонгогдсоныхоо дараа Трампын багтай хамтарч НҮБ-д элч төлөөлөгчөөр ажилласан. Никки Хэлийг 2020 оны Ерөнхийлөгчийн сонгуульд нам дотроо Трамптай өрсөлдөж магадгүй гэсэн яриа байна. Гэсэн ч Трамп түүнийг өөр салбарт эргүүлэн томилж магадгүй гэсэн таамгийг шинжээчид дэвшүүлжээ.  

Эх сурвалж: www.cnn.com, www.bbc.com 

 

---