Монгол Улсын Засгийн газрын 62 дугаар тогтоолын дагуу түүхий нүүрсний хэрэглээг нийслэлийн хэмжээнд хориглосон. Энэ хүрээнд нийслэлийн дүүрэгт иргэдийн өвлийн өрхийн хэрэглээнд зориулж сайжруулсан түлш борлуулахаар болсон. Уг сайжруулсан түлшийг зөвхөн “сайн түлшний карт”-аар айл өрхүүдэд олгохоор болсон бөгөөд энэ айл өрхөд өвлийн турш ногдох квот нь гурван тонн байх аж. “Сайн түлшний карт”-ыг өнгөрсөн даваа гарагаас эхлэн хороогоор дамжуулан үнэ төлбөргүй олгох байсан ч хэвлэлт, бүртгэл зэргээс шалтгаалан заасан хугацаандаа иргэдэд хүргэгдээгүй билээ.

Тэгвэл өнөөдрөөс Чингэлтэй дүүргээс бусад дүүргүүдэд “сайн түлшний карт”-ыг хороодоор дамжуулан олгож эхэлсэн байна.

Чингэлтэй дүүргийн хувьд энэ тавдахь өдөр гэхэд бүх хороодод тараагдаж дуусна хэмээн нийслэлийн Агаарын бохирдолтой тэмцэх газраас мэдээлэв. Тухайлбал, Сүхбаатар дүүрэгт 17228 ширхэг картыг 9, 11-20 дугаар хороонд хүлээлгэн өгсөн байна.

 Сайжруулсан түлшийг авахдаа “Сайн карт”-аа зөвхөн дүүрэгт байрлах түлш борлуулагч нарын гар утсанд суулгасан апплекшейнд уншуулж худалдан авалт хийх юм. Бусад дүүрэгт карт уншигдахгүй болохыг анхаарна уу. Уг карт нь төлбөрийн хэрэгсэл биш нэг өрх өвлийн турш хэрэглэх сайжруулсан түлшний хэрэглээг хянах цахим хяналтын хэрэгсэл юм.

 

---