Новосибирскийн Кольцово хотод байдаг Вектор Үндэсний вирус, биотехнологи судалгааны төвд хий дэлбэрсэн байна. Дэлбэрэлтийн улмаас халдварт өвчний нян хадгалж байсан лабораторид гал гарсан тухай мэдээлжээ.

Хийн дэлбэрэлт судалгааны төвийн тавдугаар давхарт байрлах ариун цэврийн үзлэгийн өрөөнд болсон байна. Гал гарсан лабораторид салхин цэцэг болон Эбола вирусын нянг судалгаанд ашиглахаар хадгалж байсан гэжээ.

Түүнчлэн Зөвлөлтийн үеийн биологийн судалгааны багаж хэрэгслүүд агуулж байжээ. Улсын халдварт өвчний  судалгааны гол төвүүдийн нэгт гарсан ослын улмаас нэг ажилтан түлэгдэж, барилгын цонх шил хагарсан байна. Галын хүрээ 30 м кв-ыг хамарсан гэж гал сөнөөгчид мэдэгджээ.

Цагаан бурхан гэгддэг салхин цэцэг өвчний нян дэлхий дээр ердөө хоёр лабораторид хадгалагддаг байна. Нэг нь даваа гарагт шатсан  Вектор судалгааны төв бол нөгөө нь АНУ-ын Атлантад байдаг Халдварт өвчний хяналтын төв дэх өндөр хамгаалалттай тусгай лабораторид хадгалагдаж байгаа юм.

 

Эх сурвалж: www.theguardian.com

---