Иран улсад цэнгэлдэх хүрээлэнд нэвтрэх гэж оролдсоныхоо төлөө шүүхээс хорих ял сонсож магадгүй байсан хөлбөмбөгийн хорхойтон эмэгтэй шүүхийн гадна зулын гол болж дэлхийн нийтэд дуу хоолойгоо хүргэхийг зорьсон билээ. Сахар Ходаяари зулын гол болж өөрийгөө шатааснаас хойш долоо хоногийн дараа амьсгал хураасан байна.

29 настай эмэгтэй даваа гарагт Тегераны эмнэлэгт нас барсан нь олон нийтийг цочирдуулжээ. Иран улсад эмэгтэйчүүд спортын олон төрлийг үзэх нээлттэй ч хөлбөмбөгийн тэмцээн үзэх, хөлбөмбөгийн цэнгэлдэх хүрээлэнд орохыг хориглодог байна.

Тэрээр өнгөрсөн гуравдугаар сард Тегераны Азади буюу Эрх чөлөө цэнгэлдэх хүрээлэнд орох гэж байгаад баригдсан юм. Шүүхээс зургаан сар хүртэл хорих ял оноохоор хэлэлцэж байжээ. Хөлбөмбөг сонирхогч Ходаяари  хөх цэнхэр өнгийн хиймэл үс, урт хүрэм өмсөн эрэгтэй хүн шиг хувцаслаж цэнгэлдэх хүрээлэнд орох гэхэд цагдаа нар барьсан байна.

Шүүх хурал эхлэх хүртэл гурав хоногийн турш эмэгтэйг хорьжээ. Эгч нь Ираны төрийн мэдээллийн агентлагт өгсөн яриандаа сэтгэцийн эрүүл мэндийн байдал нь сайнгүй, эмчилгээ хийлгэж байсан гэжээ.

Иран улсад эмэгтэйчүүдийг хөлбөмбөгийн тэмцээн үзээхээр цэнгэлдэх хүрээлэнд орохыг цаашид хүлээн зөвшөөрөх эсэх нь эргэлзээтэй хэвээр байгаа юм. Ирэх 10 дугаар сарын 2-ны өдөр Ираны хөлбөмбөгийн шигшээ баг Камбожийн эсрэг дэлхийн аваргад оролцох эрхийн төлөө тоглоно.

 

 

Эх сурвалж: www.theguardian.com

---