60 тэрбум гэдэг улстөрийн хөзрөөр далайлгаж байгаад Ерөнхий сайдын суудлыг булаах шахам авч байсан У.Хүрэлсүх ард түмний амьдралыг сайжруулна гэж сайхан амлаж байсан боловч нэг жил өнгөрлөө. Амьдрал сайжрах нь бүү хэл ажил хаялтаар далайлгаж багш нар цалингаа нэмүүлснээс өөрөөр ямар ч өөрчлөлт гарсангүй. Харин ч бүр дордлоо. 

Зөвхөн шатахууны үнэ он гарсаар дөрөв дахин нэмэгдэж, ам.доллар өссөөр, цаашид өсөх мэдээтэй болчихлоо. Монголбанк иргэдийг ам.доллараа гаргаж зарахыг уриалахаас үйл ажиллагаа нь хэтрэхгүйгээ харуулчихлаа.  

Сөрөг хүчин өчигдрийн бүлгийн хуралдаанаар дуугаа өндөрсгөж, “Хэрэв шаардлагатай гэж үзвэл төрийн болон төрийн бус байгууллагууд бусад улс төрийн намуудтай зөвшилцөөд, дараагийн улс төрийн шийдвэртэй алхмыг хийнэ” гэдгээ хэлчихлээ. Энэ нь жагсаал цуглаанаас өгсүүлээд, цаашилбал Засгийн газрыг огцруулах асуудлыг гаргаж тавина гэсэн үг.  

Ард түмний амьдралд хамгийн их нэрмээс болж байгаа зүйл нь шатахууны өсөлт. Тухайлбал, 

 

2017 оны 10 сард:

-АИ-92 1630 төгрөг

-АИ-95 1820 төгрөг

-Дизель түлш-1720 төгрөг байсан бол өнөөдрийн байдлаар 

-АИ-92 шатахуун 1830 төгрөг

-АИ-95 2160 төгрөг

 

-Дизель түлш-2150 болж жилийн дотор 200-430 төгрөгөөр тус тус нэмэгдээд байна. Мөн ам.долларын ханш өнгөрсөн нэг жилийн хугацаанд 108 төгрөгөөр өсчихлөө. Ардын засаг аанай л өмнөх Засгийн газрын өрийг төлж байна, мөнгө байхгүй байна хэмээн шалтаг хэлж нүүрээ үрчийлгэсээр.  

 

Шатахуун өсөхөөр өргөн хэрэглээний бараанаас өгсүүлээд үйлчилгээний салбарын үнэ өсдөг жамтай. Ерөнхий сайд У.Хүрэлсүх шатахууны үнийн өсөлтийг зах зээлийн жамаар нь явуулна, өсөх ёстой юм бол өсөг гээд хоёронтоо хэлчихлээ. Харин МАН-ын өчигдрийн хуралдаанаар ам.доллар болон шатахууны өсөлтийн асуудлыг Засгийн газрын судалж үз гэсэн даалгавар өгсөн хэмээн Ерөнхий сайдын яриаг зөөлрүүлэх гэж хичээлээ.

Өнөөдөр Ашигт малтмалын газраас хэвлэлийн хурал хийж “Дэлхийн зах зээл дээр өсөж байгаа учир манайд өсөхөөс өөр аргагүй” хэмээн “шинжлэх ухаанчаар” баталж, Засгийн газрыг хамгаалж байна. Маргааш Үндэсний статистикийн хорооноос мөн хэвлэлийн бага хурал хийж өргөн хэрэглээний барааны үнийг өмнөх жилийн хэдэн сартай ч юм (өөрт ашигтайгаар) харьцуулж, “Үнэ өсөж шалиагүй байна” гэсэн тайлбарыг хийж ард түмнийг тайвшруулах биз. 

Харамсалтай нь онол бор саарал байдаг бол амьдралын мод ногоон байдаг. Монголын дарга нар асуудлыг нэг, нэгэндээ чихэхдээ гаргуун. Ард түмнийг мангууруулахдаа чадамгай. Цалин нэмэгдээгүй байдаг, гэтэл бараа, үйлчилгээний үнэ өсөөд байдаг. 

Үнийн өсөлтийн шуурганд ард түмэн сөхрөх нь ээ. 

 

---