Төрийн тэргүүн хүүхэд хамгааллын асуудлыг эрчимтэй хөндөж байна. Хоёр удаагийн хэлэлцүүлгээс гадна өнгөрсөн зургадугаар сард парламентын танхимд хүүхдийн  эрүүл, амьд явах эрх ноцтой зөрчигдсөн хэргүүд ээлж дараалан гарч, нийгмийг бухимдуулж, цочроож байгаа талаар үг хэлсэн юм. Түүнээс хойш төрийн байгууллагын удирдлагуудыг хоёр дахь удаагаа дуудаж “байцааж” байна.

Монголд хүүхэд хамгааллын нөхцөл байдал ямар байгааг цөөн баримтаар дурдахад, өнгөрсөн онд 1692 гэмт хэргийн улмаас 1752 хүүхэд хохирч, 2018 оны эхний зургаан сард энэ тоо өмнөх үеийнхээс 40 хувиар өсчээ. Өнгөрсөн жил золгүй байдлаар 127 хүүхэд нас барж, 187 хүүхэд бэлгийн хүчирхийлэлд өртсөн бол 55 нь зам тээврийн осолд оржээ. Мөн жилд 2500 хүүхэд халуун тогоонд түлэгдсэн, ахуйн осолд өртсөн мэдээ байгаа нь төрийн байгууллагууд ажлын үзүүлэлтээ улам ахиулах шаардлагатайг харуулж байгаа юм.

Энэ мэтээр хүүхэд амь насаа алдсан, гэмтэж бэртсэн,  эрх нь зөрчигдсөн тоо буурахгүй байгааг Ерөнхийлөгч Х.Баттулга онцлон тэмдэглэж байв. Тэрээр “Хүүхэд хамгааллын чиглэлээр 70 гаруй санал ирсэн байна. Эдгээр саналыг үзэхэд, Хөдөлмөр, нийгмийн хамгааллын яам, Гэр бүл, хүүхэд, залуучуудын хөгжлийн газар, БСШУСЯ, Нийслэлийн боловсролын газар санаанд хүрэхгүй, хангалтгүй ажилласан нь харагдаж байна. Харин өнгөрсөн уулзалтаас хойш Мэргэжлийн хяналтын газар, ЦЕГ, Тээврийн цагдаагийн алба бодитой, шуурхай ажилласан байна. Мөн сургууль, цэцэрлэгийн хөрөнгийг төсөвт суулгахгүйгээр төр, хувийн хэвшлийн түнш­лэлээр суулгах болом­жийг судлах ажлыг УИХ-ын зарим гишүүдэд сануулж, ажил хэрэг болгох хэрэгтэй” гэлээ.

Төрийн байгуул­ла­гууд хүүхэд хамгааллын чиглэлээр ямар ажил хийж байгааг уулзалтад ирэх үеэрээ ингэж тайлаг­налаа.

 

БСШУСЯ-НЫ ТӨРИЙН НАРИЙН БИЧГИЙН ДАРГА Б.БАЯРСАЙХАН: 65 СУРГУУЛЬ ИХ ЭРСДЭЛТЭЙ ҮНЭЛЭГДСЭН

-Хүүхэд хамгааллын орчны стандартыг боловсруулж, аюулгүй ажиллагааны хяналт, шалгалт хийх чиглэлд яам эрчимтэй ажиллаж байгаа. Хэрэгжилт нь 50-100 хувьтай үргэлжилж байна. НҮБ-ын Хүүхдийн сантай хамтраад сургуулийн өмнөх боловсролын байгууллагын сургалтын орчны стандартыг баталсан. Хэрэгжүүлэх зөвлөмжийг улсын хэмжээнд бүх цэцэрлэгийн удирдлагуудад болон аймаг, нийслэл, сум, дүүргийн Боловсролын газарт хүргүүлсэн. Энэ дагуу цэцэрлэгүүд өөрсдийн хөрөнгөөр стандартыг хангах ямар бололцоо байгаа вэ гэдгээ судалж эхнээсээ хариу ирүүлж байгаа. Энэ оны арваннэгдүгээр сард дуусна. Улсын хэмжээнд 571 сургууль байгаагаас нийслэлд 100 хувь, орон нутагт гурван аймгаас бусад нь эрсдэлийн үнэлгээгээ хийсэн.  Их эрсдэлтэй үнэлэгдсэн сургууль улсын хэмжээнд 65 байгаа. Үүнээс 15 нь нийслэлд, 50 нь орон нутагт байдаг. Одоо үйл ажиллагаа явуулж буй сургуулиудын дийлэнх нь 1970 оноос хойш баригдсан барилгатай.

 

БСШУСЯ-НЫ ЕРӨНХИЙ БОЛОВСРОЛЫН ГАЗРЫН АХЛАХ МЭРГЭЖИЛТЭН Ж.МЯГМАР: ЗУРГААН НАСТАЙ ХҮҮХДҮҮДИЙГ СУРГУУЛЬД ОРОХЫГ НЭГ ЖИЛЭЭР ХОЙШЛУУЛСАН

-Боловсролын тухай хуульд зааснаар зайлшгүй шаардлагын улмаас сургуульд элсэх боломжгүй малчдын хүүхдүүдийг эцэг, эхийнх нь гаргасан үндэслэлийг харгалзан шийдвэрлэх асуудлыг тусгасан байдаг. Ийм хүсэлтийн дагуу бид зургаан настай хүүхдүүдийг нэг жилийн хугацаанд сургуульд орохыг нь хойшлуулж байгаа. Өнгөрсөн жил 1335 хүүхэд энэ маягаар элсэлтээ хойшлуулсан. Тиймээс бид хариу арга хэмжээ болгож дотуур байрныхаа нөхцөл байдлыг дээшлүүлж, хүүхдээ үлдээгээд явахад аюулгүй байх боломжийг бүрдүүлэх чиглэлээр ажиллаж байгаа. Сургуулийн дотоод орчинд өдөр өнжүүлэх ажиллуулах шийдэл гаргасан.

 

МХЕГ-ЫН ХӨДӨЛМӨР, НИЙГМИЙН ХАМГААЛАЛ, ТУСГАЙ ХЯНАЛТЫН ГАЗРЫН ДАРГА Л.ТӨГСБАЯР: ЗӨРЧИЛ ИЛЭРХ БОЛОМЖГҮЙ БАЙНА

-Улсын хэмжээнд 1645 гэрэлтүүлгийн шонг аюултай эсэхийг шалгасан. 54 зөрчлийг арилгуулсан. Мөн харилцаа холбооны 1386, цэвэр бохир, дулааны 856 шугам сүлжээний таг, 152 сургууль, 195 цэцэрлэгт шалгалт явуулсан. Шалгалтын үр дүнд 575 худгийн тагийг засварлуулж, тэмдэг тэмдэглэгээг нь сайжруулсан. Хуулийн дагуу тав хоногийн өмнө урьдчилж мэдэгдэхээр ийм төрлийн зөрчил мэдэгдэхгүй байдаг. Манай байгууллагад тулгамдаж байгаа асуудлын нэг бол яах аргагүй энэ мөн. Ийм тохиолдолд зөрчил илрэх боломжгүй байна. Хуульд өөрчлөлт оруулахгүй бол бид тав хоногийн өмнө мэдэгдэж байж л шалгана. Хэрэв өөрчлөх юм бол манай байцаагчид гэнэтийн хяналт, шалгалт хийхэд бэлэн байгаа.

 

ЦЕГ-ЫН ТЭРГҮҮН ДЭД ДАРГА, ХУРАНДАА Р.ОТГОНЖАРГАЛ: КИБЕР ГЭМТ ХЭРЭГТЭЙ ТЭМЦЭХ НЭГЖ БАЙГУУЛСАН

-Цахим гэмт хэргээс урьдчилан сэргийлэх “Unfriend” хөдөлгөөн давхардсан тоогоор 6.1 сая хүнд хүрсэн. Хэргийн шалтгаан нөхцлийг арилгах, бусад эрсдэлт хүчин зүйлээс хамгаалах, цахим орчин дахь зохистой харилцааг бий болгох чиглэлээр Харилцаа холбооны газартай хамтран ирэх сард нөлөөллийн аян зохион байгуулахаар бэлтгэл ажлаа хангаж байна. Мөн цахим орчинд гэмт хэргээс урьдчилан сэргийлэх зорилгоор ЦЕГ Кибер гэмт хэрэгтэй тэмцэх нэгж байгуулсан. Энэ хэлтэст 18 хүн ажиллаж байна. Түүнчлэн бид олон улс орнууд цахим гэмт хэргээс урьдчилан сэргийлэх чиглэлээр ямар ажил хийж байгааг судалж байгаа.

 

ТЭЭВРИЙН ЦАГДААГИЙН АЛБАНЫ УРЬДЧИЛАН СЭРГИЙЛЭХ ХЭЛТСИЙН ДАРГА Э.БӨХБАТ: ҮЗҮҮЛЭХ СУРГАЛТ ХИЙХЭД 276.3 САЯ ТӨГРӨГ ШААРДЛАГАТАЙ

-Тээврийн цагдаагийн алба зарим байгууллагатай хамтран зам тээврийн осол хэрхэн гардаг, хүүхэд хэрхэн бэртэх талаар үзүүлэх тоглолт хийсэн. Энэ үзүүлэх сургалтыг бусад сургууль зохион байгуулж өгөхийг хүссэн хүсэлтээ бидэнд олноор ирүүлж байна. Энэ сургалтыг нийслэлийн хэмжээний 134 сургуульд зохион байгуулахад 276.3 сая төгрөг, нэг сургуульд хоёр сая 60 мянга орчим төгрөг шаардлагатай.

 

ГЭР БҮЛ, ХҮҮХЭД, ЗАЛУУЧУУДЫН ХӨГЖЛИЙН ГАЗРЫН ДАРГА О.АЛТАНСҮХ: 2.4 ТЭРБУМ ТӨГРӨГИЙГ ОРОН НУТАГ, ДҮҮРГҮҮДЭД ХУВААРИЛСАН

-2018 онд УИХ хүүхэд хөгжил, хамгааллын салбарт 6.4 тэрбум төгрөг суулгасан. 2.4 тэрбум төгрөгийг орон нутаг, нийслэлийн есөн дүүрэгт хуваарилсан. Хөдөлмөр, нийгмийн хамгааллын яаман дээр 700 сая төгрөг, Гэр бүл, хүүхэд, залуучуудын хөгжлийн газарт 667 сая төгрөг, дэргэдэх байгууллага буюу “Найрамдал”, “Өнөр бүл”, “Нарт хангай”, “108” төв, хүүхэд хамгаалах байранд 789 сая төгрөг, салбар дундын үйл ажиллагаанд 1.4 тэрбум төгрөг суусан. Эдгээр зардлаас тавилга, тоног төхөөрөмжтэй холбоотой зардал нь 192.5 сая төгрөг болсон. Тавилга гэдэг нь хөгжлийн бэрхшээлтэй хүүхдүүдэд нөхөн сэргээх үйлчилгээ үзүүлдэг төвд нөхөн сэргээх төхөөрөмж, техникийн хангамж хүрэлцээгүй байгаа зарим орон нутагт компьютер, ширээ сандал авсан. Энэ нь 67.4 сая төгрөг болсон. Мөн “Өнөр бүл” төвд 23 сая төгрөгийн архивын тоног төхөөрөмж авсан.

 

НИЙСЛЭЛИЙН БОЛОВСРОЛЫН ГАЗРЫН ОРЛОГЧ ДАРГА Ц.ОТГОНЧИМЭГ: ЭЦЭГ, ЭХЧҮҮД БАГШИЙН ИЛҮҮ ЦАГИЙН ХӨЛСИЙГ ТӨЛЖ БАЙНА

-Энэ хичээлийн жилд бага ангийн болон хөгжмийн багшийн хүрэлцээ, хангамж дутагдалтай байгаа учраас яаманд хүсэлт тавьж, МУБИС-ийн дэргэд хөгжмийн анги нээгдэж 275 оюутан суралцах боломжтой болгосон. Мөн Соёл, урлагийн дэргэд 60 багш бэлтгэх анги ажиллаж байна. Хөгжмийн 90 гаруй багш мэргэжлийн бус хүмүүс байгаа. Бага ангийн багш дутагдалтай байгаа ч багшлах эрхийн шалгалтыг авахаа больсон тул хүрэлцээ сайжирна. Яг мэргэжлийн багш ажиллаж чадахгүй байна. Уртасгасан цагийн бүлэг ажиллуулах шийдэл гаргасан. Одоо эцэг, эх өөрөөсөө мөнгө гаргаж, багшийн илүү цагийн хөлсийг өгч байгаа. Харин бид Боловсролын тухай хуульд нэмэлт өөрчлөлт оруулах асуудлыг ярьж байгаа. Мөн төсөв суулгах шаардлагатай байгаа тул тодорхой алхам хийгдэх байх гэж бодож байна.

---