Яг одоо УИХ-ын чуулган дээр Үндсэн хуулийн нэмэлт, өөрчлөлтийн 2-р хэлэлцүүлэг хийгдэж буй. Тэгвэл Үндсэн хуулийн нэмэлт, өөрчлөлтийг ХҮНамаас эсэргүүцэж байгаагаа зарлалаа. Тэд Үндсэн хуулийг өөрчлөх явцад Ерөнхийлөгч өөр нэг төсөл өргөн барьснаар зөвшилцлийн нэртэй хуйвалдаан эхэлж, "улс төрийн наймаалцал"-ын зарчимд шилжлээ гэж үзэж байна. Энэ наймааны өөрчлөлт нь Монгол улсын ардчилал, тусгаар тогтнолыг устгах аюулд хүргэж байна. Улмаар намчирхал, талцлыг Үндсэн хуулиар баталгаажуулж, иргэдийн эвлэлдэн нэгдэх эрхэд шууд халдаж байна.

Өөрөөр хэлбэл, улс төрийн нам 20000 хатуу гишүүнчлэлтэй байх хатуу шаардлага тавьж байгаа нь ардчилсан зарчмаас ухарч буй үйлдэл гэж үзэж байна. Дэлхийн 200 улсаас аль нь ч ийм заалт тусгаагүй. Мөн төсвийн хулгай, авлига, 60 тэрбум, ЖДҮ, цүнх баригчдын арми, жалга довны хэрүүлийн шалтгаан болсон 76 жижиг тойргийн тогтолцоог хамгаалан авч үлдлээ. Харин Засгийн газар тогтвортой байх амин сүнс болсон кабинетийн зарчим, ерөнхий сайд нь багаа бүрдүүлж, хариуцлага хүлээх тогтолцоог 5 удаа унагасан нь маш харамсалтай явдал боллоо. МАН өөрсдийн эрх ашгийн үүднээс, ирэх 2020 оны сонгуульд ялах үүднээс энэ мэт явцуу заалтуудыг хүч түрэн батлах гэж байна.

Тиймээс Үндсэн хуулийн нэмэлт өөрчлөлтийг ард нийтийн санал асуулгаар батлуулж, ард түмнээр шийдүүлэхийг Хөдөлмөрийн Үндэсний Нам шаардаж байгаа ажээ. Хэрэв шаардлагыг хүлээж авахгүй бол тэмцлийн бүх хэлбэрийг ашиглан эмэргүүцэхээ мэдэгдлээ.

---