Нийслэлийн хэмжээнд гэмт хэргийн гаралт буурсан үзүүлэлттэй байгаа ч хичээлийн шинэ жил эхэлж, нийслэл хотын хүн амын нягтаршил хөдөлгөөн нэмэгдэж байгаатай холбогдуулан хулгай, дээрмийн хэрэг гарах болжээ. Ялангуяа бага насны хүүхдийг хуурч мэхлэх  дээрэмдэх хэрэг Баянгол дүүрэгт гарсан байна.

Нийслэлийн Цагдаагийн удирдах газрын Урьдчилан сэргийлэх хэлтсийн мэргэжилтэн цагдаагийн ахлах дэслэгч Б.Билгүүн "Өмнөх оны мөн үетэй харьцуулахад эхний найман сарын байдлаар 15 хувиар буурсан. Тэр дундаа хулгайлах гэмт хэрэг 21 хувь, халаасны хулгай 61 хувь, дээрмийн хэрэг 42 хувь буурсан ч архи согтуурах ундааны зүйлс хэрэглэсэн үед нь дээрэмдэх, бага насны хүүхдийг хуурч мэхлэн дээрэмдсэн гэрэг гарсныг цагдаагийн байгууллага шалгаж байгаа" гэв. 

Дээрмийн хэргийн хохирогчид ихэнх нь ерөнхий боловсролын сургуулийн сурагчид байна. Сурагчид гар утас, цүнх зэрэг биет зүйлсээ дээрэмдүүлж, гэмт хэргийн хохирогч болох тохиолдол нэмэгдсэн нь эцэг, эхчүүд хүүхдэдээ тавих хараа хяналт сул, харгалзах хүнгүйгээр хичээл, сургуульд нь явуулдагтай холбоотой гэдгийг цагдаагийн байгууллагаас анхааруулж байна.

 

 Ялангуяа 6-13 насны хүүхдүүдийг хуурч мэхлэн дээрэмдэх тохиолдол их байдаг тул эцэг, эхчүүд хүүхдүүддээ анхаарал тавьж, 10 хүртэлх насны хүүхдийг харгалзах хүнгүйгээр замын хөдөлгөөнд оролцуулахгүй байхыг онцгойлон анхааруулж байна.

 

 

---