Үндсэн хуулийн нэмэлт өөрчлөлтийн хоёрдугаар хэлэлцүүлэг яг одоо УИХ-ын чуулганаар хэлэлцэж байгаа билээ. Энэ талаар УИХ-ын гишүүн Л.Оюун-Эрдэнэ доорх тайлбарыг өгсөн юм.

Тэрбээр, Үндсэн хуулийн нэмэлт өөрчлөлтийг хийхээр УИХ-ын 62 гишүүн нэгдээд төсөлд гарын үсэг зурсан. Гэтэл өнөөдөр “эвэртэй туулай” үзчихсэн юм шиг ярьж байна. Гарын үсэг зурахаасаа өмнө төслөө харахгүй яасан юм бэ.

Үндсэн хуулийн нэмэлт өөрчлөлтийг заавал хийх ёстой биш. Хийвэл сэглэж хийж болохгүй. Нэгэнт эрдэмтэн, судлаачид дүгнэлтээ гаргасан учраас нэмэлт өөрчлөлтийг хийвэл хийгээд боливол болих хэрэгтэй. Хагас дутуу хийж болохгүй.

Үндсэн хуулийн нэмэлт өөрчлөлтийн хоёрдугаар хэлэлцүүлгийг энэ долоо хоногт дуусгахгүй бол татах нь зүйтэй. Тэгэхгүй бол ирэх долоо хоногоос өвөлжилтийн бэлтгэл ажил, улсын төсөв гээд хийх ажил их байна гэсэн юм.

---