Улаан өнгийн дарс хоол боловсруулах эрхтэн, гэдэс дотрын үйл ажиллагаанд сайн төдийгүй хүний биед ашигтай олон төрлийн нянгийн тоог өсгөдөг болохыг саяхан хийсэн судалгаагаар баталжээ.

Цагаан дарс, шар айраг, алимны дарсанд маш бага хэмжээтэй агуулагддаг полифенол улаан дарсанд их хэмжээгээр агуулагддаг байна. Уг полифенол гэгч бодисоос хүний биед хэрэгцээтэй ашиг тус ялгардаг аж. Мөн энэ бодис олон төрлийн жимс, хүнсний ногоонд байдаг.

Дарс хийхэд ордог улаан усан үзэмний хальсанд полифенолын бичил шим тэжээл наалдсан байдаг. Бидний гэдэс дотор олон тэрбум нян агуулдаг ба хүний биед ашигтай нянгийн тоо буурвал амархан өвчлөх, зүрхний шигдээс, хэт таргалалтай нүүр тулаад зогсохгүй зан ааш, сэтгэцийн эрүүл мэндэд нөлөөлж эхэлдэг.

Дээрх судалгаанд Их Британи, Америк, Нидерландын иргэдийг хамруулжээ. Ингэхэд улаан дарс уудаг хэрэглэгчдийн гэдсэн дэх ашигтай бактери улаан дарс огт уудаггүй хэрэглэгчдийнхээс илүү байсан байна.

Судлаачдын зөвлөснөөр долоо хоногт, ихдээ дөрөв хоногт нэг удаа хундага улаан дарс уух нь эрүүл мэндэд сайнаар нөлөөлөх ч хэтрүүлэн хэрэглэх нь зохисгүй гэжээ.

 

Эх сурвалж: www.bbc.com

---