Дэлхийн хамгийн том ширэнгэн ой Амазонд асч буй түймэр зөвхөн Бразил улсад бус олон улсад хамааралтай байгаль орчны тулгамдсан асуудал болоод байгаа юм. Бразилийн Засгийн газар Рондониа муж дахь Амазоны ширэнгэн ойд асч буй түймрийг унтраахын тулд байлдааны зориулалттай онгоцуудыг ашиглаж эхэлжээ.

Байлдааны Геркулес С-130 нисэх онгоцуудаар ус зөөж шатаж буй ойг услан түймрийг унтраахыг оролдож байна. Бразил улсын Ерөнхийлөгч Жайр Болсонаро улсын долоон мужийн ширэнгэн ойд гарсан түймрийг унтраахад цэрэг армийг оролцуулах шийдвэрийг ням гарагт гаргасан юм.  

Энэ үеэр дэлхийн тэргүүлэгч долоон орны удирдагчдын дээд хэмжээний уулзалт Францын Биарриц хотод үргэлжилсэн. Уулзалтыг зохион байгуулагч орны төрийн тэргүүн Эммануэль Макрон Амазоны ширэнгэн ойн түймрийг уулзалтын гол сэдэв болгон хөндөж түймэрт өртөж буй улс орнуудад техникийн болоод эдийн засгийн тусламж үзүүлэхийг уриалсан юм.

 

 

Энэ жил Бразилийн Амазоны ширэнгэн ойд 80,000 түймэр бүртгэгдсэн нь урьд өмнө байгаагүй их үзүүлэлт аж. Амазон нь дэлхийн хамгийн том халуун орны ширэнгэн ой төдийгүй манай гарагийн нийт хүчилтөрөгчийн 20 хувийг дангаараа үйлдвэрлэдэг уур амьсгалын өөрчлөлтийн эсрэг тэмцэх хамгийн хүчтэй зэвсэг гэж үздэг. Бразилийн Ерөнхийлөгч маханд дурлагсдад зориулж мал аж ахуй, газар тариалан хөгжүүлэхээр ойг устгалд оруулсан нь түймэр гарах шалтгаан болсон хэмээн буруутгаад байгаа юм.

 

 

Эх сурвалж: www.theguardian.com

---