Америкийн Техас мужид гэрлэлтээ батлуулсан хос ердөө хэдхэн минутын дараа авто осолд орж амиа алдсан хэрэг гарчээ.

19 настай Харли Морган, 20 настай Рианнон Будро нарын машин Бюмонтын ойролцоо Орэнж сууринд 87 дугаар төв зам дээр ачаатай чиргүүл бүхий пикап загварын автомашинтай мөргөлдсөн байна. Шинэхэн гэр бүл гэрлэлтээ батлуулчихаад төрөлх хотоосоо явж байжээ.

Хосын ард талд явж байсан сүйт залуугийн ээж, эгч хоёр аймшигт ослын гэрч болсон байна. Харли Морганы ээж Кениагийн хэлснээр “би хүүхдээ үхэж байхыг өөрийн нүдээр харсан, одоо болтол хүүгийн минь цус урсаж буй мэт санагдаж байна. Би үүнийг хэзээ ч мартахгүй, шөнө бүр энэ хар дарсан зүүдийг зүүдлэх байх” хэмээн ярьжээ.

 

 

Ослын үеэр залуу хос амиа алдсан бол тэдэнтэй мөргөлдсөн пикап машины жолооч бэртэж гэмтэлгүй эсэн мэнд үлдсэн байна. Залуу хос гэрлэлтээ батлуулсныхаа дараа 12 дугаар сарын 20-ны өдөр гэр бүл, найз нөхдийнхөө хүрээнд зул сарын баяртай давхцуулан хуримын ёслолоо хийхээр төлөвлөсөн байжээ. Ахлах сургуульдаа нэгнээ олсон залуу хосыг үхэлд хүргэсэн ослыг орон нутгийн цагдаагийн газраас шалгаж байна.

 

Эх сурвалж: www.cnn.com

---