Австралийн далбаатай Кантас Эйрвэйс нислэгийн компани энэ оны сүүлээр дэлхийн хамгийн урт шууд нислэгийг туршиж эхлэх гэж байна. Их Британийн нийслэл Лондоноос Австралийн Сидней хот хүртэл 19 цагийн турш үргэлжлэх нислэгийн туршилт амжилттай болбол 2022 онд үйлчилгээнд нэвтрүүлэх ажээ. Ингэснээр дэлхийн хамгийн урт шууд нислэгт тооцогдох юм.

Нью-Йоркоос Сидней, Лондоноос Сидней гэсэн чиглэлийн туршилтын нислэг 40 зорчигч, нислэгийн багийн гишүүдийн хамт явагдана. Нислэгийн багийнхан аяллын туршид зорчигчдын нойр, эрүүл мэндэд анхаарч хяналт тавих юм байна. Холын зайн буюу 17,000 км орчим зогсолтгүй үргэлжлэх туршилтын нислэгүүдийг Боинг 787-9 загварын онгоцуудаар гүйцэтгэхээр төлөвлөжээ. Өнгөрсөн жил Кантас Лондоноос Перт хүртэл 17 цагийн урт нислэгийг зогсолтгүй гүйцэтгэж байжээ.

 

 

Одоогоор үйлдэгдэж байгаа хамгийн урт шууд нислэгийг А350 Эйрбус онгоцоор Нью-Йоркоос Сингапурын чиглэлд Сингапур Эйрлайнс гүйцэтгэж байна. Ойролцоогоор 15,000 км зайг 18 цаг 25 минутад агаарын замаар туулж байгаа юм.

 

 

Эх сурвалж: www.bbc.com, www.theguardian.com

---