АНУ-ын Засгийн газар өнгөрсөн даваа гарагт “Төрөөс тэтгэмж авах өндөр магадлалтай” гэх ангилалд багтах гадаадын иргэдэд Ногоон карт олгох журмыг чангатгах тухай захирамж гаргажээ. Энэ талаар АНУ-ын Дотоод хэргийн яамны харьяа Иргэншил болон цагаачлалын асуудал эрхэлсэн газрын даргын үүрэг гүйцэтгэгч Кен Кучинелли “Уг захирамж нь төрөөс тэтгэмж авч амьдрахаас өөр аргагүй болон тэтгэмж авах өндөр магадлалтай хүмүүс АНУ-д ирж, Ногоон карт авахаас сэргийлэх үүднээс авч буй арга хэмжээ юм. АНУ-д ирсэн цагаачид өөрсдийгөө тэтгэж, амжилтад хүрэх нөхцөлөө хангаж, биеэ дааж хариуцлага хүлээх чадвартай байх ёстой. Энэ тухай шийдвэр хоёр сарын дараа хүчин төгөлдөр болно” хэмээжээ.

Ерөнхийдөө журмын дагуу хангалттай хэмжээний орлогогүй болон АНУ-ын Засгийн газраас олгодог нийгмийн халамжийн хөтөлбөрт (хүнсний талон, орон байр, эрүүл мэндийн тусламж) хамрагдаж байсан хүмүүс тус улсад түр болон байнга суух виз авч чадахгүй ажээ. Өөрөөр хэлбэл, АНУ зөвхөн өөрийгөө тэжээх чадвартай хүмүүст виз олгох юм байна. Төрөөс тэтгэмж авдаг этгээд гэдэгт гурван жилийн хугацаанд 12 сараас дээш хугацаанд төрөөс нэг юмуу үүнээс дээш тэтгэмж авч байсан иргэнийг хэлж байгаа аж. АНУ-ын Засгийн газраас гаргаад буй цагаачлалын тухай шинэ журам нь тус улсад хууль ёсны дагуу зорчих хүмүүсийн тоог бууруулахаар байна. Дональд Трамп Ерөнхийлөгчөөр сонгогдсоноосоо хойш АНУ-д хуулийн дагуу болон хууль бусаар цагаачлах явдлыг цэгцлэх зорилго тавиад байгаа юм.

---