“Монгол-Хятадын экспо” гурав дахь удаагийн арга хэмжээ энэ оны есдүгээр сарын 6-10-ны өдрүүдэд Өвөр Монголын Өөртөө Засах Орны нийслэл Хөх Хот, мөн Улаанцав, Тунглио хотуудад зохион байгуулагдана. Тус арга хэмжээ нь хоёр жилд нэг удаа болдог бөгөөд энэ жил гурав дахь удаагаа зохион байгуулагдах гэж буй юм.

Анхны арга хэмжээнд Монгол Улсаас 251 ААН нийт 1.2 сая юанийн борлуулалт хийсэн бол хоёр дахь удаагийнхад 400 ААН оролцож нийт 6.2 сая юанийн борлуулалт хийж байсан билээ.

Энэ удаагийн экспо нь үзэсгэлэн яармаг, соёлын солилцоо, хурал форум, хөрөнгө оруулалт гэсэн үндсэн дөрвөн хөтөлбөрийн хүрээнд зохион байгуулагдах юм.

БНХАУ-ын талаас хорио цээртэй малын гаралтай бүх төрлийн сүү, сүүн бүтээгдэхүүн, зөгийн бал, гахайн өөх, гахайн махан бүтээгдэхүүн зэрэг бүтээгдэхүүнийг хүлээж авах боломжгүйг мэдэгдсэн байна.

Мөн мах махан бүтээгдэхүүний хувьд зөвхөн БНХАУ-д экспортын зөвшөөрөлтэй аж ахуйн нэгжүүд оролцох боломжтой юм. Энэ удаагийн үзэсгэлэнд 400 гаруй аж ахуйн нэгж оролцох боломжтой бөгөөд өнөөдрийн байдлаар 200 гаруй компани Өвөрмонголд болох үзэсгэлэнд оролцохоо мэдэгдсэн байна. 

ХХААХҮЯ-ны Жижиг, дунд үйлдвэр, хоршооны бодлогын хэрэгжилтийг зохицуулах газрын дарга Я.Эрдэнэсайхан “Монгол Хятадын экспо-2019” арга хэмжээнд нийт 11,000 м.кв талбайд Монголын 400 ААН-ийг оролцуулахаар БНХАУ-ын талтай тохиролцсон. Нэг ААН-д 9 м.кв талбайд бараа бүтээгдэхүүнээ танилцуулах, борлуулах боломж олгогдоно. Мөн бас нэг зүйл нь оролцож буй ААН-үүд бараа бүтээгдэхүүнийхээ шошго, зааврыг хятад болон англи хэл дээр гаргах хэрэгтэй гэдгийг зөвлөх байна” гэлээ.

Тус үзэсгэлэнд оролцох аж ахуйн нэгжийн зохион байгуулалт, ложистик, бүртгэл зэрэг асуудлыг Монголын Үндэсний худалдаа аж үйлдвэрийн танхим, Мишээл экспо ХХК, Монголын үйлдвэрлэгчдийг дэмжих холбоо хариуцан ажиллах бөгөөд бүртгэлийн үйл ажиллагаа энэ сарын 2-12-ны өдрийг хүртэл дээрх гурван байгууллага дээр зэрэг хийгдэж байна.

 

 

 

---