ОХУ-ын Батлан хамгаалах яамнаас жил бүр уламжлал болгон зохион байгуулдаг Олон Улсын цэргийн наадамд шинэ төрөл нэмж, “Аравт” морин цэргийн наадмыг Монгол Улсад зохион байгуулах гэж буй талаар өнөөдөр БХЯ-аас мэдээлэл хийлээ.

ЗХЖШ-ын орлогч дарга, Хошууч генерал Ж.Бадамбазар:

Удахгүй болох Олон Улсын Морин цэргийн наадмын талаар товч мэдээлэл хүргэе. ОХУ-д 2003 онд анх цэргийн мэргэжлийн чиглэлээр уралдаан болж эхэлснийг 2015 онд Батлан хамгаалахын сайд С.Шойгугийн санаачлагаар олон улсын цэргийн мэргэжлийн уралдаан болгож өргөжүүлсэн. Ингэснээр Олон Улсын цэргийн мэргэжилтнүүд нэг нэгнээсээ туршлага суралцаж, хоорондоо нөхөрсөг тэмцээн уралдааныг зохион байгуулж эхэлсэн. Манай улс 2015 оноос энэ тэмцээнд тасралтгүй оролцсоор ирсэн.

Өнгөрсөн жил Олон Улсын цэргийн наадмын төрөлд морин цэргийн төрлийг оруулах шийдвэр гарсны дагуу “Аравт” морин цэргийн наадмыг анх удаа зохион байгуулахаар боллоо.

ОХУ болон Монгол Улсын Батлан хамгаалахын сайд нарын уулзалтын үеэр Монгол Улс өөрийнхөө онцлогт нийцсэн морьт цэргийн наадмын шинэ төрлийг цэргийн наадамд оруулах санал тавьсныг Оросын тал зөвшөөрч, та бүхэн өөрсдөө зохион байгуулаарай гэсний дагуу Морин цэргийн анхдугаар уралдааныг зохион байгуулахад бэлэн боллоо. Орчин цагт дэлхийн армиудад морин цэрэг хэрэглэгдэхгүй болсон. Иймд эртний уламжлалаа хадгалан авч үлдэх зорилгоор энэ наадмыг зохион байгуулж, Монголын хамгийн эртний морин цэргийн бүрэлдэхүүн болох “Аравт”-ын нэрээр нэрлэлээ. Энэ удаагийн цэргийн наадамд АНУ, Вьетнам, Зимбабье, Киргизстан, Казакстан, Хятад, Орос улс оролцоно.

Цэргийн наадам маань Төв аймгийн Аргалант, Алтанбулаг сумын нутагт болно. Морин цэргүүд сум галт хэрэгслээ морь ашиглан зөөх, замдаа морь бугуйлдах, уналга солих, морь сургах, адуугаа арчлах, усан болон минтэй талбайг гатлах зэрэг сорилуудыг давах ёстой. Үүний дараа богино зайн уралдаан болох байгаа. Тэр уралдаан явганаар эхлээд морьтойгоор үргэлжилж, биатлон шиг явагдана. Хоол хүнс, хувцас хэрэглэл, эдлэл хэрэглэл, агт морьдыг Монголын тал хариуцаж байгаа. Цэг бүр дээр камер суурилуулсан учраас шударга сайхан өрсөлдөөн болно. Энэ наадмыг зохион байгуулахад дэмжиж оролцож байгаа ивээн тэтгэгч байгууллагууддаа баярлаж талархсанаа илэрхийлье. Өнгөрөгч өдрүүдэд Олон Улсын цэргүүдийг таван цагийн турш морьтой уралдааны бэлтгэл хийлгэж бусад цагуудад Монгол зан заншил, соёлтой танилцах ажлуудыг хийлээ. Холын зайн уралдаан маргааш эхэлж, байгалийн саад бэрхшээл болон хүндрүүлсэн нөхцөлд 130 км зайд уралдаж шилдгүүдээ шалгаруулна.

БНКиргиз Улсын Дэд хурандаа А.Д.Оркошев:

Монгол улсад байх хугацаанд сэтгэгдэл үргэлж сайхан байлаа. Биднийг маш сайхнаар хүлээн авч, байр хоолоор хангаж, бэлтгэл ажлыг дээд түвшинд хийжээ. “Аравт” морин цэргийн уралдааны оролцогч улсуудын тоо ирэх жил улам их нэмэгдэх байх.

ОХУ-ын Хошууч генерал А.В.Подивилов:

Би энэ уралдаанд оролцох гэж байгаадаа баяртай байна. Монгол Улсад зочилж ирсэн энэ хугацаанд ирсэн соёлын олон арга хэмжээнд оролцлоо. Манай Улс өөрийнхөө нутаг дэвсгэрт морьт бэлтгэл сургуулилтыг сайтар базаасан. Монголд болж байгаа тэмцээнд зөвхөн Монгол морь ашиглана гэж дүрэмд заасны дагуу бид Монгол морьтойгоо дасах, сургахын тулд тусгайлан хугацаа гаргаж бэлтгэлээ базаасан.

Казакстан Улсын Хурандаа Д.Е.Хамитов:

Армийн наадмын уралдааны бэлтгэл сургуулийг сайтар хийж, тэмцээн болох газруудтай танилцсан. Бид болон манай тамирчид Монголын соёл, газар зүйн онцлогтой сайтар танилцлаа. Монгол байх хугацаанд соёл хүмүүжлийн ажил асар олон ажил явагдсан. Бидэнд бэсрэг наадам, адуучин наадам, Монгол дууг хэн сайн дуулах тэмцээнд оролцсон. Багийн гишүүдийн хооронд нөхөрсөг найрсаг уур амьсгалыг зохион байгуулагчид бий болгож чадсан. Энэ наадмын тухай мэдээллийг олон улсын хэвлэл мэдээллийн байгууллагууд дамжуулж дэлхий дахинд хүргэнэ.

---