Жил жилийн наадмын тасалбарын борлуулалт хэл ам дагуулж, иргэдийг багагүй бухимдуулсаар ирсэн. Энэ жилээс шагийн үнээр борлуулахгүй хэмээн нэг хүнд  хоёр тасалбар борлуулж байгаа ч хүрэлцээ муугаас иргэд Нийслэлийн үйлчилгээний нэгдсэн төвүүд болох “Дүнжингарав”, “Драгон”, “Мишээл”, “Оргил” гэсэн дөрвөн салбарт өдөр, шөнөгүй зогсож байна.

Манай шууд дамжуулалтын баг “Дүнжингарав” салбараас наадмын тасалбарын борлуулалтын талаар шууд дамжуулан хүргэх үеэр иргэд бухимдалтай буйгаа илэрхийлж, одоо бүх зүйл хөгжөөд гар утаснаасаа хаа байгаа газраасаа тасалбар захиалж болдог байхад жилдээ ганц өдөр болох наадмын тасалбарын учрыг шийдэж чадахгүй хэмээн бухимдаж байлаа.

Иргэдэд чирэгдэл учруулахгүй хэмээн цахимаар наадмын тасалбарыг захиалах боломжийг олгосон ч бас л иргэдийн бухимдлыг төрүүлэв.

Захиалга эхлэх цагтаа эхлээгүй бөгөөд өчигдөр гэхэд 12:00, 14:00 цагаас хэмээн цагаа хэд хэд өөрчлөсний эцэст хэдэн цагт эхэлсэн нь мэдэгдэлгүй 600 тасалбар зарагдаад дууссан гэх мэдээллийг өгсөн юм.

Тэгвэл өнөөдөр 19:30 цагаас https://eservice.ulaanbaatar.mn/ порталаар үлдсэн 600 тасалбарыг борлуулна хэмээн мэдээлжээ. 

Угтаа орчин цагт мэдээлэл харилцаа хөгжсөн үед эртнээс регистрийг нь давхцуулалгүйгээр цахимаар захиалга аваад энэ бүх асуудлыг шийдэж болно. Сүүлийн жилүүдэд онлайн тасалбар худалдан борлуулдаг хэд хэдэн компани гарч ирэн иргэд ч хаа байгаа газраасаа хүссэн цагтаа тасалбараа худалдан авдаг болсон. Наадмын тасалбарыг онлайнаар захиалсан ч заавал өөрийн биеэр Дүнжингарав төвөөс авна гэсэн нь иргэдэд улам чирэгдэл учруулсан хэрэг болов. Төв цэнгэлдэх хүрээлэнгийн зөвхөн 6, 7 дугаар секторын тасалбарыг цахимаар борлуулж байгаа нөхцөлд заавал өөрийн биеэр очин тасалбараа авч байх хэрэг юунд байна. Наадам үзэх өдрөө дээрх секторын хаалгаар ороход нь кодыг нь уншуулан оруулах боломжтой санагдах юм.

Уг нь энэ жил цахимаар тасалбар захиалаад авах боломжтой гэсэн ч энэ нь бодит байдал дээр хэрэгжсэнгүй. Ер нь наадмын тасалбарыг "шулааны" бизнес болгохоос сэргийлж, иргэдийг ч урт дараалалд зогсоохгүйгээр эртнээс бэлдэж тооцоолмоор байна. Хувийн компаниуд ямар ч асуудалгүйгээр онлайн тасалбар зараад иргэдийг чирэгдэлгүйгээр үзвэр үйлчилгээ үзүүлээд байхад төрийн байгууллага урдуур нь орж тасалбар зарах гэж иргэдийг нанчилдуулж байхаар хувийн байгууллагаар ажлаа гүйцэтгүүлж болно шүү дээ.

 

 

 

---