УЕПГ-ын Шүүхэд төрийг төлөөлөх хэлтсийн Төр нийтийн ашиг сонирхлыг хамгаалах албаны ахлах прокурор Х.Батчимэг цаг үеийн асуудлаар мэдээлэл өгчээ. 

Энэ онд Шүүхэд төрийг төлөөлөх хэлтсээс хийсэн судалгаагаар албан тушаалаа урвуулсан, хэтрүүлснээс үүдсэн хохирол төлөгдөөгүй, байгаль орчин сүйдсэний үр дагавар арилаагүй, хууль бусаар байгалийн баялгийг ашигласныг нөхөн сэргээх төлбөрийг гаргуулаагүй зэргээр хохирол төлөгдөөгүй тохиолдлууд цөөнгүй тогтоогджээ.

Тухайлбал, өнгөрсөн долоо хоногт Хан-Уул дүүргийн Иргэний хэргийн анхан шатны шүүхээр нэг төрийн албан хаагчийн үндэслэлгүйгээр хөрөнгөжсөн 644 сая төгрөгийг улсын орлого болгуулахаар прокуророос нэхэмжилсэн байна. 

Тухайн хүний үндэслэлгүйгээр хөрөнгөжсөн гэмт хэргийг Эрүүгийн хэргийн анхан шатны шүүх шийдвэрлэж, гэмт хэрэг үйлдсэн гэм буруутайд тооцсон ч хэргийн хөөн хэлэлцэх хугацаа дууссан гэх шалтгаанаар эд хөрөнгө хураагаагүй байжээ. Тиймээс иргэний журмаар прокурор нэхэмжилж, шүүхээс хөрөнгийг хураах шийдвэр гаргажээ.

Тухайн албан хаагч ямар албан тушаалтан байсан нь тодорхойгүй байгаа ч ямартай ч Хан-Уул дүүргийн төрийн албан хаагч юм байна.

 

Эх сурвалж: УЕПГ

---