™ watch
™ watch
Сүхбаатар дүүргийн III хороонд байрлах 160 дугаар цэцэрлэгийн ногоон талбайг “Өрхтий трейд” компанид барилга барих шийдвэр гаргасан Захиргааны хэргийн анхан шатны шүүгч Н.Дуламсүрэнгийн шийдвэрийг тус хорооны иргэд, цэцэрлэгийн хүүхдүүдийн эцэг, эхийн төлөөлөл эсэргүүцэж, огцрохыг шаардаж энэ сарын 1-нд жагссан юм.
“Өрхтий трейд” ХХК нь 2007 есдүгээр сард байгууллагдаад гурван сар болоогүй байж 160 дугаар цэцэрлэгийн ногоон байгууламжтай талбайг өөрийн эзэмшил болгожээ. Газрын тухай хуулинд Төрийн өмчит газрыг бусад этгээдэд шилжүүлэхгүй гэж заасан ч 2007 онд “Өрхтий Трейд” компани газрын зөвшөөрлийг гаргуулж авчээ. Харин ямар үндэслэлээр хэрхэн олж авсан нь тодорхойгүй байгаа аж.
Ингээд цэцэрлэгийн ногоон байгууламжтай дээрх газрыг 2010 оны арванхоёрдугаар сард Улаанбаатар хотын банкинд барьцаалжээ.
Газрын тухай хуулинд газраа хоёр жил ашиглаагүй бол буцаан авах эрх үүргийн хүрээнд 160 дугаар цэцэрлэг газраа 2017 онд эргүүлэн авсан байтал “Өрхтий трейд” компани 2018 оны хоёрдугаар сард нийслэлийн Захиргааны хэргийн анхан шатны шүүхэд нийслэлийн Засаг даргын захирамжийг илт хууль бус гэж үзэн хүчингүй болгох нэхэмжлэл гарган 2019 оны тавдугаар сарын 27-ны өдрийн шүүхийн шийдвэрээр “Өрхтий трейд” компанид 160 дугаар цэцэрлэгийн 4484 м.кв талбайг өгөх шийдвэр гарчээ.
Сүхбаатар дүүргийн 160 дугаар цэцэрлэгт 540 гаруй хүүхэд хүмүүждэг бөгөөд тус цэцэрлэгийн бүх цонх урагшаа харсан байрлалтай тул хүүхдүүд бүхэл өдрийн турш нарны гэрэлд тоглож, ногоон байгууламжийг хардаг байна. Гэтэл уг газарт 15 давхар гурван блок орон сууц, оффисын барилга барих нь хүүхдийн эрүүл аюулгүй орчинд өсөж тойрних эрх ашиг томоор зөрчигдөгдөж буйгаас гадна тус цэцэрлэгийн зүүн, баруун талд байрлах дөрвөн орон сууцны оршин суугчдын эрх ашиг мөн л зөрчигдөж буй юм.
Барилгын норм, стандартад зааснаар орон сууцны эзэмшлийн 50 метр хүртэлх газарт барилга байгууламж барихыг хориглосон байдаг. Гэтэл гурван метр хүрэхгүй газарт 15 давхар гурван блок барихаар зүтгэж буй “Өрхтий трейд” компанийн захирал П.Эрдэнэсайхантай утсаар холбогдлоо. Тэрбээр "Өчигдөр хөдөөнөөс орж ирлээ. Ямар асуудал гарсныг мэдээгүй. Хүүхдийн цэцэрлэг мөн ч ашиглаагүй талбай байвал барилга барьж болно" гэх хариулт өгсөн юм.
“Өрхтий трейд” компанийн хувьд уг газраа эргүүлэн авахын тулд шүүхэд дараах тайлбарыг өгчээ. Үүнд банкны барьцаанд байх хугацаанд газрын төлбөрөө төлөх болон нэхэмжлэл нэг ч удаа явуулж байгаагүй. Газраа хоёр жилээс дээш хугацаагаар ашиглаагүй гэдэгт энэ хугацаанд барилгын зураг төслийн ажлыг хийлгэж байсан гэх тайлбар өгснөөс гадна Улаанбаатар хотын банкны хууль бус үйлдлийн улмаас гурван жилийн дараа газрыг зээлийн барьцаанаас чөлөөлсөн бичгээ авах гэсээр байтал “Өрхтий трейд” компанийн 4484 метр кватрат газрын зөвшөөрлийг нийслэлийн засаг дарга цуцалсан байсан гэх тайлбар мэдүүлгийг шүүхийн байгууллагад тавьж, хүүхдийн цэцэрлэгийн талбайг өөрсдийн мэдэлд эргүүлэн аваад байгаа юм.
Үүнээс харахад нийслэлийн Засаг даргын захирамж, ямар ч үнэ цэнэгүйгээс гадна 540 гаруй хүүхдийн эрх ашиг хөндөгдөөд байгаа энэ үед нийслэлийн Засаг дарга С.Амарсайхан ямар нэгэн мэдэгдэл хийгээгүй байна.
Цэцэрлэгийн хүүхдүүдийн төлөө 160 дугаар цэцэрлэгийн удирдлагууд, эцэг, эхчүүд, оршин суугч нар давж заалдах шатны шүүхэд хандахаас гадна нийслэлийн Засаг дарга С.Амарсайхан, Ерөнхийлөгч гээд хөл хүрэх бүх газарт нийслэлийн төвд байрлах цөөхөн үлдсэн ногоон байгууламжтай газрыг авч үлдээж хэмээн бичиг өгөхөөр болжээ. Хүүхдүүдийн төлөө уг ногоон байгууламжийг хэвээр авч үлдэх эсэхийг Захиргааны хэргийн давж заалдах шатны шүүгчийн шийдвэр хамгийн чухал нөлөөтэй билээ.
