Нийслэлийн цагдаагийн газар, Нийтийн тээврийн үйлчилгээний газар, "Улаанбаатар смарт карт" компани хамтран нийтийн тээврийн 93 чиглэлд үйлчилгээ үзүүлдэг, 28 аж ахуйн нэгжийн 1200 гаруй автобусыг бүрэн камержуулж дууссан талаараа өнөөдөр мэдээлэл хийлээ.

Нийслэлийн цагдаагийн газрын Хулгайн гэмт хэрэгтэй тэмцэх хэлтсийн дарга Э.Бат-Эрдэнэ:

2019 оны гуравдугаар сарын 13-нд Нийтийн тээврийн үйлчилгээ эрхэлдэг аж ахуйн нэгж байгууллагууд хамтарсан зөвлөгөөн хийх үеэр нийтийн тээврийн бүх автобусыг бүрэн камержуулъя гэж тохирсон. Энэ ажлын дагуу нийтийн тээврийн шугамд гарч байгаа 1225 автобусыг бүрэн камержуулж дууслаа. Ингэснээр жолооч нарыг хянах, автобусанд үйлдэгдэж буй хулгайн гэмт хэргээс урьдчилан сэргийлэх, илрүүлэх, таслан зогсооход бодитой ажил болно гэж бодож байна. Халаасны хулгайн гэмт хэргийн 18 хувь нь автобусанд үйлдэгддэг. Нэг автобусанд 4 камер байрлуулсан байгаа учраас дотоод гадаад орчныг бүрэн хянана. Мөн нийтийн тээврээр үйлчлүүлж байх үедээ эд зүйлсээ хулгайд алдсан хүн байвал цагдаагийн байгууллагад хандах хэрэгтэй. Ингэсний дараа тухайн үйлчлүүлж байсан автобусны камерыг шүүж хэрэгтэнг илрүүлнэ.

Нийтийн тээврийн үйлчилгээний газрын орлогч дарга н.Мягмар

Өнөөдрийн байдлаар 93 чиглэлд 1200 гаруй автобус үйлчилж байна. Нийтийн тээврийн автобусанд байршуулсан камераар дамжуулан нэгдүгээр эгнээгээр дүрэм зөрчин зорчиж буй автомашинуудыг хянах, автобус зогсоолд бүрэн орж байгаа эсэх зөрчлийг илрүүлэх зэрэг олон талын ач холбогдолтой. Мөн автобусны жолооч нар бэлэн мөнгөөр үйлчилдэг зөрчил байхгүй болно.

"Улаанбаатар смарт карт" компанийн менежер Ц.Түвшинжаргал

Нийтийн тээврийн автобусыг бүрэн камержуулах ажил 2015 онд хийгдэж байсан. Шалгалтаар уг камеруудын 50 хувь нь ажиллахаа больсон байсныг 123 сая төгрөгөөр шинэчлэх ажил хийгдлээ. Уг камерын 80 нь онлайнаар шууд хянах боломжтой гэдгээрээ онцлог байгаа.

---