Мөнгө угаах болон терроризмыг санхүүжүүлэхтэй тэмцэх Олон Улсын санхүүгийн хориг хэрэгжүүлэх байгууллага /FATF/-ын 2018 оны 7 дугаар сарын Балба улсын Катмандуд болсон хурлаар Монгол Улсын мөнгө угаах болон терроризмыг санхүүжүүлэхтэй тэмцэх тогтолцоонд 2017 онд хийсэн Харилцан үнэлгээний тайлангаар өгөгдсөн зөвлөмжийг хэрхэн хэрэгжүүлж байгааг хэлэлцээд, Олон Улсын санхүүгийн хориг хэрэгжүүлэх байгууллагын “Саарал жагсаалт”-нд оруулах эсэхийг шийдвэрлэх хугацааг дахин 12 сараар сунгахаар болсон юм.

Гэтэл зөвлөмжийг хэрэгжилт хангалтгүй гэсэн үнэлгээг авсан тул 2019 оны 9 сарын 20-нд Монгол улсыг "Саарал жагсаалт"-д оруулахаар болсон албан бичгийг Монголбанк, Сангийн яаманд хүргүүлсэн байна гэж өнөөдөр УИХ-ын гишүүн Ж.Батзандан мэдээллээ. 

Хэрэв Монгол улс "Саарал жагсаалт"-д орвол корроспондент банкны харилцаанд сөргөөр нөлөөлж, зээлжих зэрэглэл буурах, олон улсаас татах санхүүжилтийн зардал өсөх зэрэг эрсдэл үүсдэг юм. Монгол улс хар жагсаалтад орсон нь Худалдаа хөгжлийн банкны мөнгө угаасан гэмт хэрэгтэй шууд холбоотой. Тайланд энэ зөрчил дурдагдсан ч өнгөрсөн хугацаанд Монгол улсын Засгийн газар үүн дээр дорвитой арга хэмжээ аваагүй нь "Саарал жагсаалт"-д ороход хүргэлээ гэжээ. 

---