Дэлхийн улс орнууд жил бүрийн гуравдугаар сарын 27-ны өдрийг “Олон улсын театрын өдөр” болгон тэмдэглэдэг уламжлалтай.
Гэвч энэ жилийн хувьд дэлхий нийтийг түгшээж буй коронавирусийн халдварын тархалтын улмаас урлагт хайртай хүн бүр театраа зорих боломжгүй байлаа. Чухам энэ л өдөр дэлхий даяар театр бүр шинэ бүтээлээ дэлгэж, сонгодог бүтээлүүдийг үзэгчдэдээ зориулдаг уламжлалтай ч харамсалтай нь энэ жил чадсангүй.
Харин ОХУ-ын төдийгүй дэлхийд алдартай Их театрын хамт олны зүгээс түүхэндээ анх удаа "Алтан сан, хөмрөг"-ийн сонгодог бүтээлүүдээ цахимаар шууд дамжуулан үзүүлж байна. Тус театрын захирал Владимир Урин: "Бид урьд өмнө нь хэзээ ч тулгарч байгаагүй тийм хүнд байдалд орлоо. Бидний хийж буй энэхүү ажил нь театрын урлагт хайртай хүмүүстээ сэтгэлийн эрүүл мэндийг өгнө гэдэгт найдаж байна" хэмээжээ.
"Большой Театр"-ын зүгээс гуравдугаар сарын 27-ноос дөрөвдүгээр сарын 10-ны хооронд дэлхийн сонгодог зургаан бүтээлийг онлайнаар дэлхий даяар толилуулах юм.
- Гуравдугаар сарын 27-ны өдөр "Хунт нуур" бүжгин жүжиг
- Гуравдугаар сарын 28-ны өдөр "Нойрссон гүнж" бүжгин жүжиг
- Дөрөвдүгээр сарын 1-ний өдөр "Царская невеста" дуурь
- Дөрөвдүгээр сарын 4-ний өдөр "Марко Спада" бүжгин жүжиг
- Дөрөвдүгээр сарын 7-ний өдөр "Борис Годунов" дуурь
- Дөрөвдүгээр сарын 10-ны өдөр "Шелкунчик" бүжгийн жүжгийг тус тус тоглох хуваарьтай байна.
Шууд дамжуулалт нь Большой Театрын Youtube суваг дахь албан ёсны сувгаар гарах ба Улаанбаатарын цагаар 00:00 цагт эхлэж байгаа юм. Гэвч тухайн шууд дамжуулалтын бичлэг нь 24 цаг л хадгалагдаад устах тул амжиж үзэхийг зөвлөж байна.
