Монголын зохиолчлын эвлэлийн шагналт зохиолч, яруу найрагч Д.Ган-Очирыг “Цайны цагийн зочин” булангийнхаа ээлжит дугаарт урьж, саяхан хэвлүүлсэн “Бодролын зүг” номынх нь талаар ярилцлаа.
Зохиолч Д.Ган-Очир
“Би МУИС-ийн Сэтгүүл зүйн ангийг дүүргэсэнээсээ хойш юу бичиж, юуг үлдээвээ гэж нэг хэсэг бодсон. Тэгээд орчин үеийн сэтгүүл зүйн салбарт үгүйлэгдээд байх болсон аян замын тэмдэглэл, хөрөг нийтлэлийн төрөл жанраар бичсэн нийтлэлээ “Бодролын зүг” нэртэйгээр хэвлүүллээ.
Би фэйсбүүкийг нэлээн идэвхтэй ашигладаг. Сүүлийн гурван жилийн турш нүүр номынхоо хуудаст бичсэн сэтгэгдэл, бичвэрүүдээ ном болгож гаргаарай гэсэн уншигчдын хүсэлтийн дагуу энэхүү номондоо орууллаа. Би энэ номоороо хүн байхын утга учир, хүнлэг байх нь ямар чухал болохыг харуулахыг хүссэн. Өнөөгийн нийгэмд амин хувиа хичээсэн бэртэгчин муухай үзэл их газар авч. Нийтийн сайн сайхны талаар ярих хэн ч байхгүй болсон. Хэрвээ энэ чигээрээ байсаар олон жилийг үдсэний дараа үр хүүхдүүд маань ааваа та тэр муухай цаг үед яагаад өөрийнхөө дуу хоолойг хүргээгүй юм бэ, яагаад тэр бүхэнтэй тэмцээгүй юм бэ гэж хэлүүлэхээс санаа зовсондоо ном болгож гаргалаа. Номын хуудсанд амьдралыг хүнийг мөнхөлж үлдээх нь их буян гэж би боддог. Өөрийгөө биш өрөөлийг мөнхлөх бүр сайхан” хэмээн тэрбээр хэллээ.
