Эрүүл мэндийн яамны 11 цагийн ээлжит хэвлэлийн бага хурал эхэллээ. Монгол улсад сүүлийн хоёр хоног өвчний шинэ тохиолдол бүртгэгдээгүй байгаа билээ.
ЭМЯ-ны газрын дарга Д.Нарангэрэл:
-Дэлхийн 216 оронд нийт 6 сая халдварын тохиолдол илэрч, 386 мянган хүн нас баржээ. Улмаар нийт 3 сая хүн эдгэрч, 3 сая хүн эмчлүүлж байна.
Сүүлийн 24 цагийн дотор ОХУ-д 8500 шинэ тохиолдол илэрсэн бол Буриад, Эрхүү, Тува, Читад илэрсэн тохиолдол 24-120-аар нэмэгдлээ.
Ялангуяа Эрхүүд нэг өдөрт 120, Тувад 60 тохиолдол илэрсэн байна. Тиймээс Оростой хил залгаа Сэлэнгэ, Хөвсгөл, Увс, Хэнтий, Дорнод аймгийнханд өндөр сэрэмжтэй байхыг анхааруулъя.
Шуурхай 119 дугаарт 300 дуудлага ирсэнээс нийтийн тээвэрүүд ариун цэвэрийн шаардлага хангахгүй байгаа талаар иргэд гомдол ирүүлсэн байна.
Манай улсад нэг хүн ажиглалтад шинээр орлоо. Өнөөдрийн байдлаар нийт 1,780 хүн ажиглалтын байранд байна. Үүнээс архаг хууч өвчтэй 116 хүнд 29 их эмч, 59 резидент эмч эмнэлгийн тусламж үйлчилгээ үзүүлж байна.
ХӨСҮТ-ийн захирал Д.Нямхүү:
-2020 оны зургадугаар сарын 3-нд ХӨСҮТ, Дархан-Уул аймгийн салбар лабораториудад нийт 469 хүнд коронавирусийн шинжилгээ хийснээс 468 "сөрөг" гарч коронавирус илрээгүй бол тавдугаар сарын 26-нд Москвагаас ирсэн хүний давтан шинжилгэээд вирус илэрлээ.
Сайн мэдээ гэвэл 21 хүн эдгэж дараагийн шат руу шилжлээ. Эдгээр иргэд 22 хоног эмчлэгдсэн байна. Ийнхүү эдгэсэн хүний тоо 65 болов.
Монгол улсад 186 тохиолдол албан ёсоор бүртгэгдэж нийт 65 хүн эдгэснээс 36 иргэн сувилалд, 16 хүн гэртээ, 13 хүн бүрэн ажиглалтаас гарсан байна.
