Коронавирусийн халдвараас урьдчилан сэргийлэх зорилгоор ЕБС, цэцэрлэгийн үйл ажиллагааг 2020 оны гуравдугаар сарын 2-ныг хүртэл зогсоогоод байгаа билээ. Тиймээс 03-р арын 02-ныг хүртэл БСШУСЯ-аас авч хэрэгжүүлж байгаа арга хэмжээний талаар сайд Ё.Баатарбилэг танилцууллаа.
БСШУС-ын сайд Ё.Баатарбилэг:
-Юун түрүүнд 03-р сарын 02-ныг хүртэл карантийлсан ч хичээл тарах хугацаа хойшлохгүй 06-р сарын 01 гэхэд тарах хэвээрээ. Мөн гуравдугаар улирлын амралт хоёр долоо хоног байсныг багасгаж нэг долоо хоног болгохоор төлөвлөсөн.
Хичээлээ нөхөхийн тулд гурав, дөрөв дүгээр улиралд сурагчид зургаан өдөр /даваагаас бямба гарагт/ хичээллэнэ. Бямба гарагт хичээллэж байгаатай холбогдуулан багш нарт илүү цагийн цалин бодож олгоно.
1-12-р ангийн сурагчдад өргөн нэвтрүүлгийн 18 сувгаар цахим хичээл заана. Энэ хоёр өдөрт багтаан бичээд ирэх долоо хоногоос эхэлж цахим хичээлүүд цацагдаж эхэлнэ. Ингэхдээ цагийг нь зөрүүлж, давтамжтайгаар явуулах юм байна. Харин бусад кабелийн телевизүүд дээрх бэлтгэсэн контентуудийг авч цацах боломжтой.
402 удаагийн 6357 минутын 40 хичээлийг орон даяар хүргэхээр 170 багш бэлтгэлээ хангаж байна. Өдөрт 2-4 хичээлийг 10-20 минутаар заана.
Хөл, хорио тогтоосон ч гэсэн багш нарын цалингийн урамшуулал олгогдоно. Гэхдээ нэмэгдэл олгохгүй.
Мөн хөл, хорионы хугацаанд сургуулиуд ямар ч дугуйлан, секц, уралдаан, тэмцээн зохион байгуулахгүй. Хэд хэдэн олон улсын тэмцээн, уралдаанууд хойшилсон ч үндэсний шигшээ багийн бэлтгэлүүд хэвийн үргэлжилнэ. Харин БНХАУ-ын тамирчидтай хийх хамтарсан бэлтгэлийг цуцалжээ. Соёл урлагийн бүх тоглолтууд ч мөн цуцлагдсан.
Цэцэрлэгийн багачуудад NTV-ээр хичээл заах аж.
