Ардчилсан хувьсгалын 30 жилийн ой энэ онд тохиож байна. 1989 оны 12-р сарын 10-нд монголын олон мянган сэхээтэн, ажилчин, оюутан залуус өвлийн хүйтнийг үл хайхран төв талбай дээр жагсаж, ардчилал, хүний эрхийн төлөө үг хэлсэн байдаг.
Нэг нийгмээс нөгөө нийгэм рүү шилжсэн энэ шилжилтийн үйл явцыг 30 жилийн өмнө хэрхэн хийсэн, ардчилсан хувьсгалын утга учрыг өнөөгийн залуус, өсвөр үеийнхэнд таниулахын тулд Ардчилсан холбоогоос #thanks#mdu буюу "Баярлалаа Ардчилсан холбоо" нэртэй анимэшн бүтээжээ. Уг анимейшнийг дунд сургуулийн нэг ангийнхны өдөр тутмын үйл явдлыг 30 жилийн өмнөх анхны жагсаал, цуглаантай холбон бичжээ. Сошиал сувгуудад зориулан 50 секундээс нэг минут хүртэлх хэмжээтэй, 2D хэлбэрийн зурмал анимэйшн юм.
Энэ киноноос хүүхдүүд аливаа системийн талаарх ойлголт, социализм гэж тэр үед ямар нийгэм байв, бидний эцэг эх бидний насан дээр ямар үзэл бодолтой байв, ардчилал гэгч хүнд, улс оронд юу өгдөг, хүний эрхийн талаар бид юуг мэдэж байвал зохих вэ гэдгийг ойлгож, мэдрүүлэхийг хүсчээ. Энэхүү анимейшнийг УИХ-ын гишүүн асан, Ардчилсан холооны дэд тэргүүн Л.Эрдэнэчимэг санаачлан, МҮТОНРТ-ийн захирал асан Ц.Оюундарь зохиолыг нь бичсэн байна.
Уг анимэшнийг 12-р сарын 10 буюу Олон улсын хүний эрхийн өдрөөс эхлэн 70 өдрийн турш цахим хуудсуудаар дамжуулж хүүхэд, багачуудад хүргэнэ. Үүнээс гадна Ардчилсан холбооны 30 жилийн ойн хүрээнд олон ажил хийхээр төлөвлөсөн бөгөөд 12-р сарын 10-нд төв талбайд нэгдсэн арга хэмжээ зохион байгуулахах юм байна.
