Манай улсын хүнсний ногооны хэрэгцээний дийлэнх хувийг Сэлэнгийн ногоочид дангаараа хангасаар ирсэн билээ. Тус аймгийн газар тариалангийн гол бүс нутаг болох Мандал, Баянгол, Ерөө сумдын тариаланчид энэ өдрүүдэд Улаанбаатар хотын иргэдэд шинэ ургацын ногоогоо худалдаалж эхэлжээ. Тэд Тусгаар тогтнолын талбайд яг энэ өдрүүдэд өөрсдийн тариалсан ногоог худалдаалж байгаа бөгөөд энэ сарын 27-ныг хүртэл үргэлжлэх Сэлэнгийн ногоочдын үзэсгэлэн худалдааг тус аймгаас сонгогдсон УИХ-ын гишүүн Ж.Эрдэнэбат хоёр дахь жилдээ зохион байгуулж өгсөн юм.
Сэлэнгийн ногоочид 20 гаруй төрлийн хүнсний ногоо болон нарийн ногоогоо зах зээлийн үнээс харьцангуй хямдаар худалдаалж байгаа юм.
Жишээ нь хамгийн хямд нь нэг кг төмсийг 500-800 төгрөгөөр худалдааж байсан бол даршилсан шилтэй ногоог 2000-6000 төгрөг гэх мэтээр зах зээлийн үнээс хямдаар борлуулж байна. Ногоочдоос бөөндөж авбал бүр илүү хямдралтай үнээр өгч байгааг дурдсан юм.
Үзэсгэлэн худалдааны үеэр Сэлэнгийн ногоочид нарийн ногоог хэрхэн хэрэглэх, юунд сайн болох, яаж ногоогоо даршлах зэрэг хэрэгтэй мэдээллийг тайлбарлан хэлж байлаа. Сэлэнгэ аймгийн тариаланчид хүнсний ногоогоо эх орны эрүүл хөрсөн дээр ямар ч химийн бордоо хэрэглэхгүйгээр тарьдаг гэдгийг онцольё. Сэлэнгийн шинэ ногооны үзэсгэлэн худалдаа есдүгээр сарын 27 хүртэл Тусгаар тогтнолын талбай дээр болно
