Жүдо бөхийн Бакугийн их дуулга тэмцээн өчигдөр Азербайжан улсын нийслэл Баку хотноо албан ёсоор эхэллээ. Тэмцээний эхний өдөр манай улсаас Хөдөлмөрийн баатар, МУГТ Д.Сумьяа тэргүүтэй долоон бөх барилдаж МУГТ Д.Сумъяа шагналт байр, МУГТ Д.Амартүвшин, Ё.Басхүү нар хүрэл медаль хүртсэн билээ. МУГТ Д.Амартүвшингийн бүх барилдааны бичлэгийг үзэхийг хүсвэл энд дарна уу. Ё.Басхүүгийн барилдаануудын бичлэгийг үзэхийг энд дарна уу. 

Тэгвэл өнөөдөр тэмцээний хоёр дахь өдөр уламжлал ёсоор эрэгтэйчүүдийн -73кг, -81кг, эмэгтэйчүүдийн -63кг,-70кг жингийн барилдаануудаар үргэлжлэн явагдана. 

Өнөөдөр манай улсаас гурван бөх татамид гарах ба манай бөхчүүдийн оноолтыг танилцуулж байна. 

Эрэгтэйчүүдийн -73кг жинд Б.Батболд А хэсэгт эхний тойрогт гоц мөргөж хоёрдугаар тойрогт Тажикстаны жүдоч М.Сомонтой барилдах оноолт гарчээ. 

Эрэгтэйчүүдийн -81кг жинд Н.Дагвасүрэн эхний тойрогт Польшийн С.Дамиантай барилдах оноолттой байна. 

Эмэгтэйчүүдийн -63кг жинд Б.Ганхайч эхний тойрогт өсвөрийн дэлхийн аваргын мөнгөн медальт Румыны Д.Аделинатай барилдах оноолт гарчээ. Хоёр бөхийн хувьд өмнө нь гурван удаа учраа тааран барилдахад манай Б.Ганхайч хоёр удаа даваад байгаа юм. 

Тэмцээний хуваарь /Улаанбаатарын цагаар/:

15:00 цагаас хэсгийн барилдаанууд явагдана.

21:00 цагаас медалийн төлөөх барилдаанууд явагдана.