Сонирхогчдын боксын Азийн тивийн аварга шалгаруулах тэмцээн улсын нийслэл Бангкок хотноо дөрөвдүгээр сарын 16-27-ны хооронд зохион байгуулагдаж өнгөрлөө. Энэ удаагийн тэмцээний нэг онцлог нь эрэгтэй, эмэгтэй боксчид Бангкок хотноо хамтдаа аваргаа шалгаруулсан юм. Манай улсаас Боксын Үндэсний эрэгтэй, эмэгтэй шигшээ баг МУГДасгалжуулагч Д.Батсүрэн, Б.Пүрэв-Очир, О.Батхүү, М.Буянжаргал нарын удирдлага дор эрэгтэй, эмэгтэй тус бүр есөн тамирчин буюу нийт 18 тамирчин оролцож Азийн наадмын аварга Э.Цэндбаатар эрэгтэйчүүдийн 60кг жинд алтан медаль хүртэж дараах долоон тамирчин хүрэл медаль хүртсэн амжилттайгаар тэмцээнээ өндөрлүүллээ. 

• Эмэгтэйчүүдийн 48кг жинд Б.Мөнгөнсаран
• 54кг жинд М.Нандинцэцэг
• 60кг жинд М.Намуун
• +81кг жинд Э.Ундрам
• Эрэгтэйчүүдийн 56кг жинд Х.Энх-Амар
• 64кг жинд Б.Чинзориг
• 81кг жинд Н.Шинэбаяр нар тус бүр хүрэл медаль хүртэцгээлээ.

Эрэгтэйчүүдийн 60кг жинд урамтай сайхан тулаануудыг үзүүлсэн Э.Цэндбаатар хагас шигшээд Узбекистан улсын боксчин Ш.Рахимовтой тулалдан илт илүүрхэн ялалт байгуулсан юм. 

Алтан медалийн төлөө Казахстан улсын боксчин З.Сафиуллинтай тулалдан мөн л төвөггүйхэн ялж Э.Цэндбаатар Азийн аварга болсон Монголын 15 дахь боксчин боллоо.