Олон улсын жүдо бөхийн холбооны (IJF) уламжлалт томоохон тэмцээн болох Тбилисийн гран при тэмцээн гурав хоногийн турш үргэлжлэн явагдаж дууслаа. Уг тэмцээнийг манай баг тамирчид хоёр хүрэл медаль (МУГТ М.Уранцэцэг, Г.Алтанбагана нар) хүртэж дөрвөн бөх шагналт байранд орсон амжилтаар өндөрлүүллээ.

Тэгвэл энэ долоо хоногт дараагийн цуврал тэмцээн болох Анталиягийн гран при тэмцээн Турк улсын Анталия хотноо зохион байгуулагдана. Нэр хүнд өндөртэй олон тамирчин оролцдог Анталия гран при тэмцээнд энэ жил 78 орны 537 тамирчин оролцох урьдчилсан мэдүүлгээ өгөөд байна. Манай улсаас дэлхийн аваргын дөрвөн медальтан гавьяатууд болох М.Уранцэцэг, Г.Болдбаатар, Д.Амартүвшин, Г.Одбаяр тэргүүтэй 20 тамирчин оролцох урьдчилсан мэдүүлгээ өгчээ.

Эмэгтэйчүүдийн -48кг жингийн дэлхийн чансааг тэргүүлэгч М.Уранцэцэг гавьяат энэ удаад дээд жиндээ буюу -52кг жинд барилдах мэдүүлгээ өгчээ.   

Өнгөрсөн жилийн Анталия гран при тэмцээнд манайхаас Хөдөлмөрийн баатар, МУГТ Н.Түвшинбаяр тэргүүтэй найман эрэгтэй бөх оролцож гурван хүрэл медаль авч байсан байна. 

2018 оны Анталия гран при тэмцээний шилдэг барилдаануудын түүвэр бичлэгийг толилуулж байна.