Энэ долоо хоногт хоёр Эл Классико болох ба хоёулаа реалын талбайд болох юм. Эхний Эл Класико Мадрид хотноо Копа дел Рейн хагас шигшээ хариу тоглолтын хүрээнд явагдаж Каталончууд өрсөлдөгчөө 3 гоолоор хожиж тус тэмцээний шигшээ тоглолтод шалгарлаа.
Тоглолтын эхний үед Реал Мадрид санаачлагыг гартаа авч хэд хэдэн аюултай довтолгоонуудыг хийсэн ч хараахан гоол оруулж чадаагүй юм. Харин хоёрдугаар үе эхлээд удаагүй байхад Дембэлэгийн дамжуулалтаар Луис Суарес гоолдох нь тэр. Гоол алдсан талбайн эзэд урагшаа довтолж эхлэхэд хойно үүссэн сул зайг Барсачууд хоёр ч удаа овжин ашигласнаар тооны харьцааг 13 минутын дотор 0:3 болгож чадсан юм. Гэвч энэ хугацаанд Реалчууд зүгээр суусангүй хэд хэдэн гоолын боломжуудыг үүсгэсээр байлаа.
Ингэж Барселона заналт өрсөлдөгчөө гэрт нь хожин бүх цаг үеийн Эль Класикогийн хожлын харьцааг тэнцүүлсэн юм.
Реал Мадрид Барселона клубуудын тоглолтын тойм бичлэгийг хүлээн авч үзнэ үү.
