Энэ сарын 22-24 өдрүүдэд жүдо бөхийн Дюсселдорф их дуулга тэмцээнд 99 орны 700 гаруй жүдоч оролцох урьдчилсан мэдүүлгээ өгөөд байгаа бол Монгол улсаас урьдчилсан байдлаар Хөдөлмөрийн баатар, Олимпийн алт, мөнгө, дэлхийн хүрэл медальт МУГТ Н.Түвшинбаяр тэргүүтэй 19 шилдэг жүдочид оролцох мэдүүлгээ өгөөд байна.
Дюсселдорф их дуулга тэмцээнээс урьтаж Европын хоёр нээлттэй тэмцээн Итали болон Австри улсад зохион байгуулагдана. Эдгээр тэмцээнүүд нь Дюсселдорф их дуулга тэмцээний өмнөх томоохон сорил тэмцээн болох юм.
Өнөөдөр Австри улсын Оберварт хотноо дэлхийн 35 орны 199 эмэгтэй жүдочид оролцох Европын эмэгтэйчүүдийн нээлттэй тэмцээн зохион байгуулагдана. Уг тэмцээнд манай 7 жүдоч оролцох юм. Үүнд:
Эмэгтэй
48кг жинд Ганбаатарын Наранцэцэг В хэсгийг тэргүүлэн барилдах тул эхний тойрогт гоц мөргөсөн байна.
52kг жинд Л.Сосорбарам D хэсгийг тэргүүлэн барилдах тулд мөн эхний тойрогт гоц мөргөсөн байна.
57kг жинд Л.Энхрийлэн D хэсгийг тэргүүлэн барилдах ба эхний тойрогт гоц мөргөж, хоёрдугаар тойрогт Австрийн Тэодоракис Асиминатай барилдах оноолт гарчээ.
63kг жинд Б.Ганхайч С хэсгийг тэргүүлэн барилдах тул мөн эхний тойрогт гоц мөргөсөн байна.
70kг жинд Б.Баасанжаргал эхний тойрогт Германы Муэллер Лисатай барилдах оноолт гарчээ.
-78kг жинд С.Сэржмядаг эхний тойрогт Казакстаны Тилеукханова Назеркетэй барилдах оноолт гарчээ.
+78kг Э.Гандиймаа эхний тойрогт БНХАУ-ын Жианг Янантай барилдах оноолт гарчээ.
Энэ сарын эхээр Португалийн Одивелас хотод зохион байгуулагдсан Европын нээлттэй тэмцээний эхний өдрийн шилдэг барилдааны түүвэр бичлэгийг хүргэж байна.
