Жүдо бөхийн Бакугийн их дуулга тэмцээний эхний өдрийн таван жинд Япон бөхчүүд аваргаллаа. 

Уламжлал ёсоор эхний өдөр хөнгөн жин буюу эрэгтэйчүүдийн -60, -66 кг, эмэгтэйчүүдийн -48, 52, -57 кг гэсэн таван жингийн барилдаанууд явагдлаа. Манай улсаас таван залуу бөх хүч үзсэн ч харамсалтай нь медаль хүртэж чадсангүй.  

Энэ өдрийн таван жинд Япон улсаас найман бөх барилдаж таван алт, гурван мөнгөн медаль хүртэн төгс амжилт үзүүллээ. Тодруулбал:

Эмэгтэйчүүдийн -48кг жинд:

Парис 2024 олимпын алт, дэлхийн гурван удаагийн аварга Н.Цүнода их дуулга ангиллын зургаа дахь алтан медалиа хүртлээ. 

Эмэгтэйчүүдийн -52кг жинд:

Токио 2020 олимпын алт, дэлхийн дөрвөн удаагийн аварга У.Абе Парис 2024 олимпын наадамд ялагдал хүлээхдээ уйлсан тэр төрхийг бүгд сайн санаж байгаа нь дамжиггүй. Тэгвэл тэрээр ялагдлаасаа хойш анх удаа тэмцээнд орохдоо эргэн ирснээ чанга дуугаар зарлан алтан медаль хүртлээ. Энэ нь түүний их дуулга ангиллаас хүртэж буй 10 дахь алтан медаль юм. 

Эмэгтэйчүүдийн -57кг жинд:

Энэ жинд Япон улс хоёр тамирчнаа сойсон ба дэлхийн аваргын мөнгө, хүрэл медальт М.Тамаоки аваргын алтан медаль хүртэж 2024 оны Португалийн гран пригийн хүрэл медальт А.Такано мөнгөн медаль хүртлээ. Таамгийн дагуу япон бөхчүүд шигшээ барилдаанд тунан үлдсэн ба М.Тамаоки туршлага зааж их дуулга ангиллын тав дахь алтан медалиа хүртлээ. 

Эрэгтэйчүүдийн -60, -66 кг жингийн аваргуудын талаарх мэдээллийг бид дараагийн дугаартаа хүргэж болно.