Жүдо бөхийн уламжлалт Бакугийн их дуулга тэмцээн өнөөдөр/2 сарын 14-ний өдөр/  албан ёсоор эхэлж байна. 

Азербайжан улсын нийслэл Баку хотноо зохион байгуулагдаж буй жүдо бөхийн уламжлалт Бакугийн их дуулга тэмцээнд 36 орны 258 жүдоч хүч үзэх ба манай улсаас эрэгтэй дөрөв, эмэгтэй нэг буюу нийт таван залуу жүдоч хүч үзнэ. Тэмцээний хуваарийн мэдээллийг ЭНД дарж үзнэ үү. 

Тэмцээн уламжлал ёсоор хөнгөн жингийн барилдаануудаар эхэлж байгаа ба Баку их дуулгад зодоглож буй манай таван залуу жүдоч бүгд өнөөдөр барилдана. 

Эрэгтэйчүүдийн -60кг жинд:

Залуучуудын Ази тивийн хошой хүрэл медальт Н.Мэндсайхан В хэсгийн эхний тойрогт гоц мөргөж улмаар хоёрдугаар тойрогт Мастерсийн хүрэл, 2022 оны Бакугийн их дуулгын аварга, 2021, 2023 оны Парисын их дуулга хошой аварга Азербайжаны Б.Агхаевтэй барилдах оноолттой байна.

D хэсэгт М.Тэргэлсар эхний тойрогт мөн эзэн орны бөх М.Мурадлитэй оноолт таарсан байна. 

Эрэгтэйчүүдийн -66кг жинд:

Залуу бөх Б.Нямренчин А хэсгийн эхний тойрогт Германы М.Сетзтэй учраа таарсан байна. 

С хэсэгт А.Азбаатар эхний тойрогт Монтенегрогийн Ж.Нурковичтэй учраа таарсан байна. 

Эмэгтэйчүүдийн -52кг жинд:

Өнгөрсөн оны залуучуудын Ази тивийн аваргын хүрэл медальт Б.Уранзаяа эхний тойрогт гоц мөргөж улмаар хоёрдугаар тойрогт Анталя, Казахстан, Парисын их дуулгуудын хүрэл медальт Испанийн А.С.Лейватай барилдах оноолттой байна. 

Бакугийн их дуулга тэмцээний хэсгийн барилдааныг олон улсын жүдо бөхийн холбооны вэб сайтаас шууд хүлээн авч үзэх боломжтой ба медалийн төлөөх барилдааныг Улаанбаатарын цагаар 21:00 цагт С1 телевизээр хүлээн авч үзнэ үү.