Холимог тулааны шилдэг тамирчин Б.Энх-Оргил энэ оны эхний тулаанаа Экуадор улсын тулаанчтай хийхээр боллоо. 

Монголын холимог тулааны MGL-1 холбооны хошой аварга, дэлхийн тэргүүлэх One championship холбооны хагас хөнгөн жин буюу 66кг жингийн чансааны 5-д эрэмбэлэгдэж буй Б.Энх-Оргилын хувьд One championship холбоонд нийт таван тулаан хийж дөрөв ялаад байгаа юм. Тэрээр хамгийн сүүлд өнгөрөгч оны наймдугаар сард Филиппин улсын Карло Бумина-ангийг боолтоор ялснаас хойш тулаан хийгээгүй байгаа юм. Харин энэ удаа түүний өрсөлдөгчөөр Экуадорын Аарон Канартэ байх болно. 

Муай Тай, Жюүжицү суурьтай тулаанч Аарон Канартэ нь мэргэжлийн 12 тулаанд орж 10 ялалт, хоёр ялагдалтай явна. One championship холбоонд орж ирсэн даруйдаа супер хоёр тулаанчтай таарч ялагдал хүлээгээд байна. Өмнө нь Мексикийн UWC холбоонд "гялалзаж явсан" Аарон Канарте энэ жил 28 настай бол Б.Энх-Оргил 36 настай юм.  

Аарон Канарте нэгдүгээр сарын 10-ны өдөр анхны төлөвлөгөө ёсоор ОХУ-ын шилдэг тулаанч Тимофей Настюхинтэй тулалдах товтой байсан ч цуцлагдаж Б.Энх-Оргил тулалдахаар болсон юм. 

Тулаан Улаанбаатарын цагаар нэгдүгээр сарын 11-ний өглөө 9:00 цагт эхлэх ба манай Б.Энх-Оргил гурав дахь тулаанд гарч ирэх юм. Тулааны спорт сонирхогч монголчуудын бахархалт Б.Энх-Оргил аваргадаа амжилтын дээдийг хүсэн ерөөе.