Мэргэжлийн дартсын корпорациас зохион байгуулдаг 31 дэх дэлхийн аварга шалгаруулах тэмцээнд Английн тамирчин Лук Хамфрис түрүүллээ.
Он дамжин зохион байгуулагддаг уламжлалын дагуу мэргэжлийн дартсын энэ удаагийн ДАШТ-ий онцлог нь хагас шигшээд шалгарсан дөрвөн тамирчин болох Роб Кросс, Лук Хамфрис, Лук Литтлер, Скотт Уильямс нар бүгд Англи тамирчид байлаа.
Шигшээ тоглолтод өрсөлдөж үзүүр түрүү хүртсэн Лук Литтлерийн хувьд энэ жил 16 настай бөгөөд ДАШТ-ий шигшээд өрсөлдсөн хамгийн залуу тамирчнаар бүртгэгдээд байна. Харин анхны түрүүгээ хүртэж буй Лук Хамфрис энэ мөчөөс эхлэн дэлхийн аварга хэмээн цоллуулахаас гадна дэлхийн чансааг тэргүүлж эхэллээ.
ДАШТ-ий ивээн тэтгэгчдийн зүгээс тоглолтын хамгийн өндөр оноо болох 180 оноо авсан тоглолт тутамд 1000 фунт стерлингийг түрүү булчирхайн хорт хавдрын эсрэг аянд хандивлахаа зарлаад байсан юм. Тэмцээний үеэр 914 дээд амжилт бүртгэгдэж нийт 914.000 фунт стерлинг буюу монгол мөнгөөр 4 тэрбум орчим төгрөг болсон байна.
