Шайбтай хоккейн 48 дахь удаагийн залуучуудын дэлхийн аварга шалгаруулах тэмцээн хоёрхон хоногийн дараа эхэлнэ. 

20 хүртэлх залуучуудын ДАШТ жил бүрийн төгсгөлд эхэлж он дамжин дуусдаг уламжлалын дагуу энэ сарын 26-ны өдрөөс 2024 оны нэгдүгээр сарын 5-ны өдөр Швед улсад зохион байгуулагдана. Өнгөрсөн оны ДАШТ ОХУ-ын Новосибирск, Омск хотууд зохион байгуулагдах байсан ч тэд Украин улс руу халдан довтолсон тул ДАШТ зохион байгуулах эрхийг нь цуцлахаас гадна тэднийг ДАШТ-д ч оролцуулаагүй юм. Дайн үргэлжлэн явагдсаар байгаа тул шайбтай хоккейгоор дэлхийд хүчтэйд тооцогддог оросын баг энэ жил мөн л ДАШТ-д оролцох эрхгүй. 

Өнгөрсөн оны ДАШТ-д шигшээд тунан үлдсэн Канад, Чехийн багууд А болон Б хэсгийг тэргүүлэн тоглоно.

А хэсэгт: Канад, Швед, Финланд, Герман, Латви

В хэсэгт: Чех, АНУ, Словак, Швейцар, Норвег

Сүүлийн хоёр ДАШТ дараалан аваргын титмийг хүртээд буй (нийт 20 удаа түрүүлсэн) Канадын шигшээ багийнхан мэдээж бүх багуудыг тэргүүлж байгаа ба тэд эхний тоглолтоо Финландын эсрэг хийнэ.