3х3 сагсанбөмбөгийн цуврал тэмцээнүүдийн нэг болох "FIBA 3X3 Yichang Challenger 2023" тэмцээнд Монгол улсаас Зайсан МИГ даатгал, Завхан Sainscore багууд өрсөлдөж байна.
БНХАУ-ын Шинжин хотноо амралтын өдрүүдэд (наймдугаар сарын 5-6-ны өдрүүд) зохион байгуулагдаж буй тус тэмцээнд найман орны 12 баг өрсөлдөж байна. Өчигдөр хэсгийн тоглолтууд явагдаж манай хоёр баг хоёул хасагдах шатанд шалгараад байна.
В хэсгийн эхний тоглолтдоо Завхан Sainscore баг Нидерландын Утреч багийг нэмэлт цагт 18:16 харьцаагаар буулган авсан юм. Удаах тоглолтдоо Малайзын Куала Лампур багийг 21:6 харьцаагаар илт илүүрхэн буулган авч хэсгээ тэргүүлж хасагдах шатанд шалгарлаа. Завхан Sainscore баг хасагдах шатанд БНХАУ-ын Вуши багтаа өнөөдөр Улаанбаатарын цагаар 16:50 цагт тоглох хуваарьтай байна.
А хэсэгт Зайсан МИГ даатгал баг тэмцээнийг тэргүүлэгч БНХАУ-ын Футиан багт 21:16 харьцаагаар хожигдсон ч Филиппиний Манила Чоокс багийг 22:17 харьцаагаар буулган авч хэсгээсээ гарлаа. Өнөөдөр Зайсан МИГ даатгал хасагдах шатанд БНХАУ-ын Вухан багтай Улаанбаатарын цагаар 17:15 цагт өрсөлдөнө. Ташрамд сонирхуулахад Зайсан МИГ даатгал компанийн бүрэлдэхүүнд төрсөн ах, дүүс буюу М.Өлзий-Орших, М.Өлзийбат нар хамтран тоглож байна.
