Өнгөрөгч долоо хоногт Английн хөлбөмбөгийн премьер лигийн хүрээнд Манчестер Юнайтед болон Кристал Палас клубуудын хооронд өрнөсөн тоглолт олны анхаарлын төвд ороод байна. 

Хоёр багийн тоглогчдын хооронд эмх замбараагүй байдал үүссэн явдалд Английн хөлбөмбөгийн холбоо тус хоёр клубыг буруутгаж байгаа юм. Тус тоглолтын 67 дахь минутад Кристал Паласын Жеффрей Шлупп Энтониг түлхэн талбайгаас гаргаснаар нийтийг хамарсан эмх замбараагүй байдал үүслээ. Тус сөргөлдөөний явцад Каземиро хагас хамгаалагч Хьюзийг багалзуурдсан болохыг хяналтын бичлэг үзэн тогтоож улмаар түүнд улаан хуудас өгч талбайгаас хөөсөн юм. Шүүгчид Бразил тоглогчийн хүчирхийлэл үйлдсэн хэмээн буруутгаж гурван тоглолт өнжөөх шийтгэл оноолоо. 

Гэвч бас нэг өнцөг харагдаж байгаа нь Каземиро өөрт улаан хуудас өгөхөөс өмнө инээмсэглэн Вилл Хьюзийг тэвэрч байгаа нь дүрс бичлэг болон зурагт үлдсэн байна. 

Энэхүү сөргөлдөөн тийм ч удаан үргэлжлээгүй бөгөөд эцсийн үр дүнд Манчестер Юнайтед клуб 2:1 харьцаагаар өрсөлдөгчөө буулган авч хүснэгтийн 3-р байрт бичигдсэн хэвээр үлдлээ.