Мэргэжлийн снукер биллиардын 49 дэх удаагийн Мастерс тэмцээний шөвгийн найман тамирчин тодорлоо. 

Шилдэг 16 тамирчин урилгаар оролцдог Мастерс тэмцээн эхний тоглолтуудаасаа өрсөлдөөнтэй явагдаж эхэлсэн ба өмнөх жилийн аварга Нейл Робертсон, Марк Селби, Жон Хиггинс зэрэг аваргууд хожигдон тэмцээнээ дуусгасан талаар бид өмнө нь мэдээлсэн билээ. 

Тэгвэл урьд шөнө 2019 оны дэлхийн аварга Жадд Трамп Уэлсийн Рейн Дейтэй эн тэнцүүхэн өрсөлдсөний эцэст ялалт байгуулж шигшээ наймд шалгарлаа. Жадд Трампын хувьд Мастерс тэмцээнд нэг удаа түрүүлж байсан ба тэр нь дэлхийн аварга болдог жилээ домогт Ронни О Сулливаныг шигшээд буулган авч байлаа. Жадд Трамп өнгөрөгч онд нэг л тэмцээнд түрүүлж /Туркийн Мастерс/ ДАШТ болон Аваргуудын аварга тэмцээнүүдийн шигшээд шалгарсан ч Ронни аваргад хожигдон түрүүлж чадаагүй байгаа. Энэ удаад ч тэд шөвгийн наймд өрсөлдөгчдөө хожвол хагас шигшээ учраа таарахаар байна. 

Урьд шөнө явагдсан бас нэгэн гоёмсог тоглолт нь дэлхийн гурван удаагийн аварга Марк Уиллиамс болон Девид Гилберт нарын учраа байлаа. Уиллиамс аварга тоглолтын эхнээс илт илүүрхсээр хожил авсан ба шөвгийн наймд мөнхийн өрсөлдөгч Ронни аваргатай учраа таарлаа. Марк Уиллиамсын хувьд 1998, 2003 онуудад домогт Стифен Хенри аваргыг ялж мастерст түрүүлж байсан түүхтэй.