Монгол улсын нийслэл Улаанбаатар хотноо өнгөрөгч долоо хоногт зохион байгуулагдсан Улаанбаатарын их дуулга тэмцээнээс "Парис 2024" олимпын наадмын жүдо бөхийн эрхийн оноо олгогдож эхэлсэн бол түүний дараагийн тэмцээн Унгарын их дуулга тэмцээн зохион байгуулагдахад ес хоног үлдлээ. 

Урьдчилсан байдлаар Унгарын их дуулга тэмцээнд таван тивийн 69 орны 466 жүдоч оролцох мэдүүлгээ өгөөд байгаагийн дотор монголын шигшээ багаас 15 жүдоч оролцох мэдүүлгээ өгчээ. 

Энэ удаагийн Унгарын их дуулга тэмцээнд Францын шигшээ баг нэлээд өргөн бүрэлдэхүүнтэй оролцож байгаа алдарт Тэдди аварга тэргүүтэй 22 хүний бүрэлдэхүүнтэй оролцох мэдүүлгээ өгчээ. Мөн түүнчлэн энэхүү тэмцээний нэгэн онцлог бол Саейд Моллай аварга Азербайжан улсын нэр дээрээс анхныхаа тэмцээнд барилдахаар мэдүүлгээ өгчээ. Иргэншил сольсон учраас олон улсын жүдо бөхийн холбооны бүртгэлийн нэгдсэн систем дээрээс түүний өмнөх бүх амжилтуудын мэдээлэл үгүй болсон ч дэлхийн чансаа нь хадгалагдан үлдсэн байна. С.Моллай аварга -81кг жиндээ есдүгээрт эрэмбэлэгдэж байна.